Shavkat Mirziyoyev Osiyoda hamkorlik va ishonch choralari bo‘yicha kengashning VI sammitida so‘zlagan nutqida mamlakatlar radikal g‘oyalarning keng xurujiga yanada ko‘proq to‘qnash kelayotganiga e’tibor qaratdi.
Prezidentning ta’kidlashicha, buzg‘unchi kuchlar targ‘ibot va mafkuraviy ta’sirning yangi uslublaridan foydalangan holda ekstremistik tashkilotlarga yoshlarni faol jalb etmoqda. Shu munosabat bilan yosh avlodni radikalizmdan asrash, ularning kuch-g‘ayrat va shijoatini bunyodkorlik sari yo‘naltirish uchun tizimli hamkorlikni o‘rnatish kerak.
“O‘g‘il-qizlarimiz o‘z kuchiga ishonishi, adolatli kelajakni qaror toptirishda o‘z ishtirokini his etishi, o‘z salohiyat va umidlarini amalda ro‘yobga chiqarish imkoniyatlariga ega bo‘lishi lozim.
Majlisimizning Yoshlar kengashi hamraisi sifatida turli yoshdagi insonlar o‘rtasida bir-birini yaxshiroq tushunishga da’vat etadigan, farzandlarimizning eng dolzarb muammolariga birgalikda yechim izlashga ko‘maklashuvchi yangi formatni — Avlodlar muloqotini yo‘lga qo‘yishni taklif etamiz”, — dedi davlat rahbari.
Shavkat Mirziyoyev Yosh yetakchilar Forumi doirasida bunday ilk uchrashuvni 2023-yil aprel oyida Samarqandda o‘tkazishni taklif qildi.
Mavzuga doir: Shavkat Mirziyoyev Afg‘oniston muvaqqat hukumati bilan xalqaro muzokaralar guruhini tuzishni taklif qildi
Izoh (0)