Markaziy bank O‘zbekistondagi ikkita bankdan litsenziyalarni qaytarib oldi. Ularni tugatish komissiyasi tuzildi
Markaziy bank boshqaruvining 2022-yil 7-oktabrdagi qaroriga asosan “Turkistonbank” va “Hi-tech bank” xususiy banklaridan bank faoliyatini amalga oshirish huquqini beruvchi litsenziya chaqirib olindi.
“Turkistonbank” aktivlar hajmi bo‘yicha O‘zbekiston bank tizimida 26-o‘rinni, “Hi-tech bank” esa 29-o‘rinni egallagan.
Ikkala bank tomonidan ham “Banklar va bank faoliyati to‘g‘risida”gi qonunning 54 va 77-moddalarida belgilangan qoidabuzarliklar sodir etilgan:
- bank aktivlari bo‘yicha ehtimoliy yo‘qotishlarga qarshi yetarlicha zaxiraning mavjud emasligi;
- regulyativ kapitalining ellik foizidan ortiq miqdorda zarar ko‘rganligini;
- bank xizmatlari iste’molchilarining huquqlari va qonuniy manfaatlari buzilganligi;
- buxgalteriya hisobining hisobotga oid ma’lumotlar buzilishiga olib keladigan va bankning haqiqiy moliyaviy ahvolini aks ettirish imkonini bermaydigan qoidabuzarliklar bilan yuritilganligi;
- bank faoliyatidagi qo‘pol qoidabuzarliklarni bartaraf etish to‘g‘risidagi Markaziy bank ko‘rsatmalarining belgilangan muddatda bajarilmaganligi;
Markaziy bank boshqaruvining yuqorida keltirilgan qaroriga asosan “Turkistonbank” va “Hi-tech bank”ni tugatish komissiyasi tarkibi tayinlandi.
“Banklar va bank faoliyati to‘g‘risida”gi Qonunga asosan bank ishlarini boshqarish bo‘yicha, shu jumladan, bank aksiyadorlarining umumiy yig‘ilishi, kuzatuv kengashi va boshqaruvi vakolatlari ushbu komissiyaga o‘tdi.
Omonatchilar uchun ma’lumot:
“Turkistonbank” va “Hi-tech bank” omonatchilarining barcha mablag‘lari, 2 oydan so‘ng to‘liq qaytariladi.
Aholiga omonat mablag‘larini qaytarish Fuqarolarning banklardagi omonatlarini kafolatlash fondi tomonidan ushbu qonunda belgilangan tartibda amalga oshiriladi.
Omonatlarni qaytarish bo‘yicha batafsil ma’lumotni O‘zbekiston Markaziy bankining 71-200-00-44, 71-236-75-24 ishonch telefonlari orqali olish mumkin.
