O‘zbekistondan shaftoli va nektarin eksporti mavsumi sentabr oyining ikkinchi yarmi yoki uchinchi o‘n kunligida tugaydi. Oxirgi o‘n kun ichida O‘zbekistondan shaftoli eksporti deyarli kuzatilmadi, bu esa ushbu mahsulot eksport mavsumi tugaganini bildiradi.
O‘zbekistondagi joriy shaftoli mavsumi nisbatan past narxlar, tashqi bozorlarga jo‘natmalar keskin oshgani va rekord darajadagi eksport tushumlari bilan ajralib turdi. Bu haqda EastFruit xabar bermoqda.
2022-yil iyun o‘rtalarida O‘zbekistondan joriy shaftoli eksporti mavsumi muvaffaqiyatli boshlangan edi.
Ushbu mahsulotlarning birinchi partiyalarini jo‘natish may oyining uchinchi o‘n kunligida — birinchi ulgurji partiyalar ichki bozorda paydo bo‘lgan o‘sha davrda boshlangan.
2022-yil may oyining uchinchi o‘n kunligida va iyun oyining birinchi yarmida O‘zbekistondan shaftoli eksporti hajmi fizik ko‘rinishda 2021-yilning shu davriga nisbatan 3 baravar ko‘p bo‘ldi.
Bunga 2022-yilgi ommaviy yig‘im-terim mavsumi boshida ushbu mahsulotlarning ichki bozorda ulgurji narxlari keskin tushib ketgani yordam berdi.
Bunday narx dinamikasi o‘tgan yili kuzatilgan edi, biroq bu yil ommaviy shaftoli yig‘im-terim mavsumi boshida narxlarning pasayish sur’ati 2021-yilga nisbatan ancha yuqori bo‘ldi.
O‘zbekistonda shaftoli ommaviy yig‘im-terimining joriy mavsumi iyun oyining birinchi o‘n kunligida, o‘tgan yilga nisbatan qariyb bir hafta erta boshlangandi.
2022-yil iyun oyining ikkinchi o‘n kunligidan 10-iyulgacha O‘zbekistonda shaftoli ulgurji narxlarining bir xil pasayish dinamikasi kuzatildi, biroq o‘rtacha ulgurji narxlar o‘tgan yilgi darajadan 20-35 foizga past bo‘ldi.
2022-yilgi mavsumda O‘zbekistondan shaftoli eksporti hajmining 99 foizdan sal ortig‘i Yevrosiyo iqtisodiy ittifoqi mamlakatlari bozorlariga jo‘natildi.
Qolganlari import qiluvchi davlatlar o‘rtasida taqsimlangan: Turkmaniston — 471 tonna, Tojikiston — 42 tonna, Mo‘g‘uliston — 14 tonna va Birlashgan Arab Amirliklari — 4 tonna.
Izoh (0)