O‘zbekistonning Ummon sultonligidagi elchixonasida O‘zbekistonga xorijiy sayyohlar oqimini oshirish, O‘mon va Fors ko‘rfazi mintaqasi bozorlariga mamlakatda ishlab chiqarilgan mahsulotlar eksporti ko‘lamini kengaytirish maqsadida Salam Air aviakompaniyasi tijorat va xalqaro hamkorlik boshqarmasi direktori Mazin al-Salmaniy hamda uning tijorat bo‘yicha menejerlari Kulsum al-Balushiya va Xolid al-Riyamiylar bilan uchrashuv o‘tkazildi. Bu haqda “Dunyo” axborot agentligi xabar qildi.
Qayd etilishicha, uchrashuvda Salam Air aviakompaniyasi vakillariga Samarqandda ishga tushirilgan yangi xalqaro aeroport, u yerda yaratilgan qulayliklar, shu jumladan, joriy yil 1-oktabridan boshlab “Ochiq osmon” rejimi joriy etilgani ma’lum qilingan.
Mazin al-Salmaniyning so‘zlariga ko‘ra, O‘zbekistonda Markaziy Osiyoning muhim transport xabiga aylanishi uchun barcha imkoniyatlar mavjud. Shu sababli u aviakompaniya tomonidan Maskat—Toshkent yo‘nalishi bo‘yicha avvaliga charter, so‘ngra doimiy parvozlarni (taxminan joriy yil noyabr oyidan boshlab) amalga oshirish masalasi ko‘rib chiqilayotganini bildirgan.
Hozirgi paytda parvozlarni boshlash uchun barcha sharoitlar yetarli bo‘lib, ikki mamlakat o‘rtasida to‘g‘ridan to‘g‘ri havo qatnovlarini yo‘lga qo‘yish bo‘yicha kuchga kirgan bitim huquqiy asos bo‘lib xizmat qiladi.
Ma’lumot uchun, 2020-yil 11-maydan e’tiboran O‘zbekiston hukumati va Ummon sultonligi hukumati o‘rtasida havo qatnovi to‘g‘risidagi bitim kuchga kirgan. Kelishuvlarga muvofiq, Salam Air aviakompaniyasi sultonlik tomonidan havo qatnovi tashuvchisi hisoblanadi.
Izoh (0)