Shavkat Mirziyoyev 10-oktabr kuni “Humo Arena” sport saroyiga tashrif buyurib, dzyudo bo‘yicha jahon chempionati bellashuvlarini tomosha qildi. Bu haqda prezident matbuot xizmati xabar berdi.
Ta’kidlanishicha, bu nufuzi bo‘yicha Olimpiya o‘yinlaridan keyingi o‘rinda turadigan muhim musobaqa hisoblanadi. O‘zbekistonda birinchi marta o‘tayotgan mazkur chempionatda 82 ta mamlakatdan 571 nafar dzyudochi ishtirok etmoqda. O‘zbekiston milliy terma jamoasi safida 18 nafar yigit-qiz kurashmoqda.
Davlat rahbari erkaklar o‘rtasida 90 kilogrammgacha bo‘lgan vazn toifasidagi final bellashuvini kuzatdi. Qizg‘in va teng kurashlar ostida o‘tgan bahsda Davlat Bobonov italiyalik raqibi Kristian Parlatini yengib, oltin medalni qo‘lga kiritdi. Bu mamlakat dzyudosi tarixida yana bir katta muvaffaqiyat bo‘ldi.
G‘olib Davlat Bobonov (oltin) va sovrindorlar Kristian Parlati (kumush), gruziyalik Lasha Bekauri va Luka Maysuradzega (bronza) medallarni Shavkat Mirziyoyev topshirdi. Musobaqaning keyingi kunlarida yana to‘rt nafar o‘zbekistonlik sportchi gilamga chiqadi. Jahon chempionati 13-oktabr kuni yakunlanadi.
Izoh (0)