O‘zbekiston futbol assotsiatsiyasi Hakamlar qo‘mitasi Ilgiz Tantashevni PFL tomonidan o‘tkaziladigan uchrashuvlarni boshqarishdan noma’lum muddatga chetlatildi.
Tantashev Superliganing 21-turidan o‘rin olgan “Nasaf” va “So‘g‘diyona” o‘rtasidagi bahsni (1:1) boshqardi. O‘yinda “So‘g‘diyona” a’zosi Javohir Qahramonov to‘p uchun kurashda “Nasaf” darvozaboni va himoyachisi bilan to‘qnashib, raqib jarima maydoni ichida yiqilib tushdi. Bosh hakam dastlab o‘yin qoidasi buzilmaganini qayd etdi. Biroq VARga murojaat qilgach, qarorini o‘zgartirib, penalti belgiladi.
Ekspert-hakamlar komissiyasi Tantashevning ushbu uchrashuvdagi harakatlariga baho berib, chora ko‘rilishi uchun O‘FA Hakamlar qo‘mitasiga taqdimnoma kiritgandi.
O‘FA Hakamlar qo‘mitasi keng e’tirozlarga sabab bo‘lgan o‘yinda Ilgiz Tantashevning harakatlarini o‘rganib chiqdi va qaror chiqardi:
“Katta ahamiyatga ega bahsda o‘yin natijasiga ta’sir etadigan qo‘pol xatolarga yo‘l qo‘ygani va jamoatchilik orasida keskin e’tirozlarga sababchi bo‘lgan hakam Ilgiz Tantashev PFL tomonidan o‘tkaziladigan har qanday uchrashuvlarini boshqarishdan nomuayyan muddatga chetlatildi”.
Izoh (0)