Uylar ijarasi qimmatlashishi kutilmoqda: O‘zbekistonda aholining inflyatsion kutilmalari qanday bo‘lmoqda?

Markaziy bank sentabr oyida o‘tkazilgan so‘rov natijalariga ko‘ra, aholi tomonidan sezilgan inflyatsiya darajasini ma’lum qildi.

Aholining kelgusi 12 oy uchun narxlar o‘sishi bo‘yicha inflyatsion kutilmalari pasayuvchi dinamikani saqlab qolib, 15,2 foiz atrofida shakllandi.

Kelgusi 12 oyda inflyatsiya ko‘rsatkichi joriy darajada yoki undan yuqoriroq bo‘lishini kutayotgan respondentlarning ulushi avvalgi oyga nisbatan 1 foiz bandga qisqargan.

Sentabr oyida aholining ko‘pchilik qismi kelgusi 12 oyda inflyatsiyani 9-12 foiz atrofida bo‘lishini kutishmoqda.

Aholi tomonidan kelgusi davrda narxlarga oshiruvchi bosim ko‘rsatishi mumkin bo‘lgan asosiy omillar sifatida quydagilar ta’kidlangan: 

• import tovarlari va asosiy oziq-ovqat mahsulotlari — 42 foiz; 
• valyuta kursining qadrsizlanishi — 42 foiz; 
• narxlarning sun’iy oshirilishi — 31 foiz. 

Shu bilan birga, turar joy hamda ijara to‘lovlarining oshishini ko‘rsatgan aholi vakillarining ulushi o‘tgan oyga nisbatan yuqorilagan — 15 foizdan 18 foizgacha.

Avvalroq O‘zbekistonda sentabr oyida 1 foizlik inflyatsiya qayd etilgani haqida xabar berilgan edi.