Ижтимоий тармоқларда мактаб қоровулхонасида директор ва котиб, шунингдек қоровул спиртли ичимлик ичиб ўтиргани акс этган видео тарқалганди. «Дарё» билан суҳбатда бўлган Чироқчи ХТБ мудири Фарҳод Жуманов воқеа тумандаги 67-мактабда содир бўлганини маълум қилди.
Туман ХТБ мудирининг маълумот беришича, видеода директор экани айтилган киши 67-умумий ўрта таълим мактабининг 39 ёшли директори Лочин Турдимуродов ҳисобланади.Вилоятимизнинг Деҳқонобод туманидан келган Лочин Турдимуродов ушбу мактабда 2021 йилнинг 31 мартидан бери фаолият юритиб келади, — дейди бўлим мудири.Фарҳод Жумановнинг дастлабки маълумотига кўра, видео тахминан 2022 йил 5 июль куни мактаб қоровулхонасида суратга олинган.
Видео директорнинг маънавий-маърифий ишлари бўйича ўринбосари А.Норимовнинг шахсий телефони орқали тасвирга олинган. Мактаб директори ва ўринбосари ўртасидаги келишмовчиликлар сабаб ўринбосар шу видеодан фойдаланиш мақсадида директорга кўрсатиб, рағбат пули ёзишни талаб қилган. Натижада А.Норимовга рағбатлантириш пули тўлаб берилган. 2022 йил август ойида эса республика аудит назорати томонидан ўрганилганда рағбат мактабнинг педагоглар кенгаши томонидан кўриб чиқилмасдан тўланган деб хулоса қилинган ва қайта тўлашга тушган. А.Норимов бунга жавобан ушбу видеолавҳани орадан уч ой ўтиб, 2022 йил 5 октябрь куни ижтимоий тармоқларга жойлаган, — дейди Фарҳод Жуманов.ХТБ мудирининг қўшимча қилишича, мактаб директори Лочин Турдимуродов айни кунда вилоят халқ таълим бошқармасининг 2022 йил 30 сентябрдаги хатига асосан Абдулла Авлоний номидаги педагогларни касбий ривожлантириш ва методикаларга ўргатиш миллий тадқиқот институтида малака оширмоқда.
Директорга телефон қилиб, вазиятни сўраганимизда спиртли ичимлик дея видеода кўрсатилган шишада сомсага сепиш учун «уксус» бор бўлганини айтди. Видеода қатнашган техник ходимлар билан боғланиш имкони бўлмади. Ҳолат юзасидан қўшимча ахборот берамиз, — дейди ХТБ мудири.Маълум қилинишича, 67-мактаб вилоятдаги мактаблар рейтингида 818-ўринда, тумандаги рейтингда эса 78-ўринда туради. Ўқувчиларининг олий таълимга кириш кўрсатгичи 2022 йилда 65,3 фоизни ташкил қилган.
Изоҳ (0)