Andijon davlat universitetida rahbarlar “ro‘mol, soqolni quvlab kun o‘tkazayotgani” aytilgan murojaatga munosabat bildirildi

Andijon davlat universitetida rahbariyat “ro‘mol, soqolni quvlab kun o‘tkazayotgani” aytilgan murojaat e’lon qilingandi. Oliygoh matbuot xizmati holat yuzasidan munosabat bildirdi.

Unda ta’kidlanishicha, universitetning o‘z ichki-tartib, intizom va odob-axloq qoidalari mavjud. Ularga amal qilishni targ‘ib etish esa har bir xodimning vazifasi hisoblanadi.

Ammo zo‘ravonlik va aksiyalar bilan, majburlash orqali bunga erishishga harakat qilish universitet siyosatiga zid. Mazkur murojaat matnidan ham ko‘rinib turibdiki, bunday holatlarga yo‘l qo‘yilmagan.

Universitet xodimlari tomonidan ushbu mavzu bo‘yicha nojo‘ya xatti-harakatlar sodir etilgan taqdirda va bu haqda aniq ma’lumotlar bo‘lsa, ma’muriyat zudlik bilan bu masalani muhokama qilishga va tegishli tartibda chora ko‘rishga tayyor ekanini bildiradi.

Andijon davlat universiteti o‘z faoliyatiga oid masalalarda mavjud muammolarni ko‘rsatib, unga ijobiy yechim topilishida hissasini qo‘shayotgan OAV va blogerlarga o‘z minnatdorchiligini bildiradi, — deyilgan munosabatda.