Vengriya poytaxti Budapesht shahridagi Shandor saroyida 4-oktabr kuni Shavkat Mirziyoyevning Vengriya prezidenti Katalin Novak bilan uchrashuvi bo‘lib o‘tdi. Bu haqda Prezident matbuot xizmati xabar qildi.
Qayd etilishicha, uchrashuv avvalida O‘zbekiston rahbari Faxriy mehmonlar kitobida qayd qoldirgan, yetakchilar birgalikda suratga tushgan.
Prezidentlar O‘zbekiston va Vengriya o‘rtasidagi ko‘p qirrali strategik sheriklik munosabatlarini kengaytirish masalalari yuzasidan fikr almashgan. Ikki tomonlama hamkorlik jadal rivojlanib borayotgani, siyosiy muloqot chuqurlashib, o‘zaro ko‘mak davom ettirilayotgani, parlamentlararo va jamoatchilik aloqalari kengayib borayotgani ta’kidlangan.
Savdo-iqtisodiy va investitsiyaviy hamkorlikni rivojlantirish ustuvor ahamiyatga ega ekani qayd etilgan. Keyingi yillarda tovar ayirboshlash hajmi qariyb uch barobar oshgani ta’kidlangan.
Bu boradagi ishlarni faollashtirishda iqtisodiy hamkorlik bo‘yicha O‘zbekiston—Vengriya hukumatlararo komissiyasi va 3-oktabr kuni Budapeshtda ikkinchi yig‘ilishini o‘tkazgan O‘zbekiston—Vengriya Ishbilarmonlar kengashi muhim o‘rin tutmoqda.
Tomonlar O‘zbekiston Yevropa Ittifoqining GSP+ preferensiyalar tizimiga qo‘shilgani o‘zaro savdoni salmoqli darajada ko‘paytirish va diversifikatsiya qilish uchun yangi imkoniyatlar ochishini ta’kidlagan.
Vengriya Hukumati “Xungarikum” dasturi doirasida o‘zbekistonlik talaba va doktorantlar uchun har yili ajratiladigan kvotani 170 tagacha oshirish to‘g‘risida qaror qabul qilgan. O‘zbekiston va Vengriya oliy ta’lim muassasalari rektorlarining ikkinchi forumini o‘tkazish maqsadga muvofiqligi ko‘rsatib o‘tilgan.
Davlat rahbarlari xalqaro va mintaqaviy ahamiyatga molik dolzarb masalalar yuzasidan ham fikr almashgan. Ko‘p tomonlama tuzilmalar doirasidagi faol muloqotni va o‘zaro ko‘makni davom ettirish masalalarini muhokama qilgan.
Uchrashuv yakunida Shavkat Mirziyoyev Vengriya prezidentini o‘zi uchun qulay vaqtda tashrif bilan O‘zbekistonga borishga taklif etgan.
Izoh (0)