Shavkat Mirziyoyev Vengriyaga rasmiy tashrifi doirasida 4-oktabr kuni Budapesht shahrining Qahramonlar maydonidagi xotira ustuni poyiga gulchambar qo‘ydi. Bu haqda Prezident matbuot xizmati xabar qildi.
Qayd etilishicha, davlat rahbari Vengriya davlatchiligini barpo etishga hissa qo‘shgan arboblar xotirasiga hurmat bajo keltirgan. Marosim faxriy qorovul xizmatchilari ishtirokida, harbiy orkestr sadolari ostida o‘tgan.
Ushbu maskan Budapeshtning bosh maydonlaridan biri bo‘lib, YUNЕSKOning Butunjahon merosi ro‘yxatiga kiritilgan. Maydon markazida Mingyillik ustuni qad rostlagan, uning poyida mojar qabilalarining 7 nafar boshlig‘i haykallari o‘rnatilgan. Ushbu yodgorlik vengerlarning bugungi vatanini topishi va Vengriya qirolligiga asos solinishiga bag‘ishlangan.
Majmuada venger xalqining atoqli namoyandalari haykallaridan iborat 2 ta kolonnada joylashgan. Yodgorlikning old tomonida Vengriya qahramonlari sharafiga xotira toshtaxtasi o‘rnatilgan.
Izoh (0)