Bosh prokuratura matbuot xizmati Ichki ishlar vazirligi xodimini qasddan o‘ldirilib, jasadi Chirchiq daryosiga tashlab yuborilganini xabar berdi.
Bosh prokuratura matbuot kotibi Hayot Shamsutdinovning “Daryo” so‘roviga asosan aniqlik kiritishicha, voqea Toshkent shahrida yuz bergan. 29-sentabr kuni Ichki ishlar vazirligida boshqarma tezkor vakili lavozimida ishlagan xodim o‘zaro kelishmovchilik natijasida ikki nafar shaxs tomonidan qasddan o‘ldirilib, jasadi Chirchiq daryosiga tashlab yuborilgan.
Mazkur holat yuzasidan Jinoyat kodeksining 97-moddasi (qasddan odam o‘ldirish) bilan jinoyat ishi qo‘zg‘atilgan. O‘tkazilgan qidiruv harakatlari davomida jabrlanuvchining murdasi daryodan topilgan. Gumonlanuvchilar protsessual tartibda ushlangan.
“Hozirda tergov harakatlari olib borilmoqda. Tergovga aralashish va to‘sqinlik qilish holatlarining oldini olish maqsadida boshqa tafsilotlar oshkor qilinmaydi”, — deyiladi xabarda.
Izoh (0)