Axloqsizlarcha so‘kingani tarqalgan Oqqo‘rg‘on IIB sobiq xodimi o‘z qilmishi uchun xalqdan yig‘lab kechirim so‘radi. Uning videomurojaati tuman hokimligi tomonidan e’lon qilindi.
“Men shu yili Oqqo‘rg‘on tumani Ichki ishlarga ishga kirdim, ishlay olmadim. Meni 2-3 marta ogohlantirishdi. Shundan so‘ng bir ayol bilan janjallashib qoldim. Keyin meni ishdan bo‘shatishdi. Oradan 10 kun o‘tib, o‘sha ayol menga telefon qildi. O‘sha paytda men mast holatda edim. Jahlim chiqib har xil so‘zlar bilan haqoratladim. Nimalar deganimni o‘zim ham bilmayman. Butun Oqqo‘rg‘on aholisidan, O‘zbekiston aholisidan bir umr kechirim so‘rayman. Bu ishlarimdan pushaymonman. Ota-onamdan ham kechirim so‘rayman”, — deydi u.
Uning onasi ham el-yurtga murojaat bilan chiqish istagini bildirgan. Unda ona o‘g‘lining so‘zlari uchun jamoatchilikdan uzr so‘radi. Tuman hokimligi matbuot xizmati xabariga ko‘ra, oila qattiq tushkunlikka tushgan, otasining sog‘lig‘i og‘irlashib, uy sharoitida davolanmoqda.
Toshkent viloyati prokuraturasi yigitga nisbatan 2-oktabr kuni tuman prokuraturasi tomonidan Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atilgani, gumon qilinuvchi sifatida Jinoyat protsessual kodeksining 221-moddasi (ushlab turish asoslari) tartibida ushlanib, qamoq ehtiyot chorasi qo‘llanganini bildirdi.
Viloyat IIBB axborot xizmati rahbari holat to‘liq nazoratga olingani va qonuniy tartibda chora ko‘rilishini ma’lum qildi.
Izoh (0)