«Давлат ОАВ эркинлиги, ахборот излаш, олиш ва тарқатиш ҳуқуқларини кафолатлайди» — Конституциянинг 67-моддасига янги нормалар киритилмоқда

Ўзбекистон конституциясининг 67-моддасига янги нормаларни қўшимча тарзида киритиш кўзда тутилмоқда. Бу ҳақда Конституциявий комиссия матбуот котиби Одилжон Тожиев маълум қилди.

Қайд этилишича, такомиллаштирилаётган конституцияга оммавий ахборот воситалари вакиллари ва уларнинг фаолияти эркинлигини кафолатлаш борасида ўзгартиш ва қўшимчалар киритилиши белгиланмоқда. Хусусан, бош қомуснинг 67-моддасига янги нормаларни киритиш назарда тутилмоқда.

Амалдаги конституциянинг 67-моддасида: «Оммавий ахборот воситалари эркиндир ва қонунга мувофиқ ишлайди. Улар ахборотнинг тўғрилиги учун белгиланган тартибда жавобгардирлар. Цензурага йўл қўйилмайди», дея белгилаб қўйилган.

Одилжон Тожиевга кўра, ушбу моддага қуйидаги янги нормаларни қўшимча тарзида киритиш кўзда тутилмоқда:

«Давлат оммавий ахборот воситалари фаолиятининг эркинлигини, уларнинг ахборотни излаш, олиш, ахборотдан фойдаланиш ва уни тарқатишга бўлган ҳуқуқлари амалга оширилишини кафолатлайди.

Оммавий ахборот воситаларининг ва журналистларнинг фаолиятига тўсқинлик қилиш ёки аралашиш қонунга мувофиқ жавобгарликка сабаб бўлади.

Оммавий ахборот воситалари ўзлари тақдим этадиган ахборотнинг тўғрилиги учун жавобгардир», – дея маълум қилган Олий Мажлис Қонунчилик палатаси спикерининг ўринбосари.

Одилжон Тожиевга кўра, айни кунларда конституцияга ўзгартиш ва қўшимчалар киритишга оид конституциявий қонун лойиҳасининг умумхалқ муҳокамаси давомида аҳолидан келиб тушган таклифлар Олий Мажлис Қонунчилик палатаси масъул қўмиталари томонидан умумлаштирилиб, маромига етказилмоқда.

Аввалроқ президент Шавкат Мирзиёев 27 июнь — Матбуот ва оммавий ахборот воситалари ходимлари куни муносабати билан соҳа ходимларига табрик йўллаб, сўз ва матбуот эркинлиги доимо конституция, қонунлар ҳамда президент ҳимоясида бўлишини айтганди.

«Кейинги пайтда ижтимоий тармоқлар орқали баъзи жойларда оммавий ахборот воситаси ходимларига менсимай қараш, уларнинг ўз ваколати доирасида эркин фаолият юритишига тўсқинлик қилиш ҳолатлари учраётгани ҳақида хабарлар тарқалаётгани ҳам бу фикрни тасдиқлайди. Шу муносабат билан яна бир бор таъкидлаб айтмоқчиман: биз барпо этаётган ҳуқуқий демократик давлатда сўз ва матбуот эркинлиги доимо бош қомусимиз ва қонунларимиз ҳамда президент ҳимоясида бўлади.

Оммавий ахборот воситалари ходимларининг ўз фаолиятини қонун доирасида эркин амалга оширишига тўсқинлик қилиш – бу демократик ислоҳотларимизга қарши ҳаракат, мамлакатимизнинг обрўсига путур етказиш сифатида баҳоланиши керак. Суд ва прокуратура органлари бизга мутлақо ярашмайдиган бундай салбий ҳолатлар бўйича қатъий чоралар кўриши лозим», — деган эди давлат раҳбари.

Эслатиб ўтамиз, «Чегара билмас мухбирлар» халқаро ноҳукумат ташкилоти томонидан тузиладиган Сўз эркинлиги индексининг 2022 йилги рейтингида Ўзбекистон ўз кўрсаткичларини бирдан 24 позицияга яхшилаб, 133-ўринга кўтарилгани хабар қилинганди.