Toshkentda o‘sish, Sirdaryoda pasayish: avgust oyida bank operatsiyalari soni tahlil qilindi

2022-yil avgust oyi bo‘yicha O‘zbekiston bank hisob varaqalari bo‘yicha operatsiyalar tahlil qilindi. Bu haqda “Daryo”ga Iqtisodiy tadqiqotlar va islohotlar markazi xabar bermoqda.

Avgust oyida banklararo to‘lov operatsiyalari soni 5,7 milliontani tashkil etdi va 2022-yilning iyul oyiga nisbatan 652,2 ming tranzaksiyaga (12,9 foiz) oshdi.

Shu davrda mamlakatning 12 ta hududida yuridik shaxslar o‘rtasidagi bank operatsiyalari soni o‘tgan oyga nisbatan oshgan.

Xususan, sezilarli darajadagi o‘sish Toshkent shahri (18 foiz), Qoraqalpog‘iston (10,6 foiz), Farg‘ona (10,3 foiz) va Buxoro (10,1 foiz) viloyatlarida kuzatilgan.

Shu bilan birga ushbu ko‘rsatkich Sirdaryo (-8 foiz) va Qashqadaryo (-1,4 foiz) viloyatlarida kamaygan.

2022-yil 1-sentabr holatiga mamlakat bank tizimining aktivlari jami 532,1 trln so‘mni (o‘tgan yilga nisbatan o‘sish 31,8 foiz), majburiyatlari 455,7 trln so‘m (+ 34,3 foiz), kreditlar 355,5 trln so‘m (+ 15,7 foiz) hamda depozitlar 205,7 trln so‘m (+ 56,7 foiz). Hozirgi kunda bank tizimida 57,8 ming kishi faoliyat olib bormoqda.

Avvalroq O‘zbekistondagi eng faol banklar reytingi yangilangani haqida xabar berilgandi.