Tashqi mehnat migratsiya agentligining Yekaterinburg shahridagi vakilligi va mamlakatning Bosh konsulxona xodimlari hududdagi Xorijiy fuqarolarni vaqtinchalik saqlash markaziga tashrif buyurdi. Tashrif doirasida ushbu muassasada vaqtinchalik joylashtirilgan 46 nafar fuqaro bilan davra suhbati tashkil etildi.
Suhbatda ularga ushbu davlat qonunlariga rioya qilish, nizoli vaziyatlarga aralashmaslik, muammoli vaziyatlarda vakolatli organlar hamda mamlakatning ushbu davlatdagi diplomatik idoralariga murojaat qilish kerakligi tushuntirildi.
Shuningdek, mehnat migrantlari bilan asosan ularni vatanga tezroq qaytish masalalari va sodir etilgan huquqbuzarliklariga nisbatan chiqarilgan sud qarori tafsilotlariga oid masalalar bo‘yicha suhbatlashildi. Muloqot chog‘ida fuqarolarning aksariyati Rossiyada bo‘lish tartib-qoidalarini buzgani sababli ushbu muassasaga keltirilganligi ma’lum bo‘ldi.
Vatandoshlarga sud qarori asosida Rossiyadan chiqarib yuborish chorasi qo‘llanilganida O‘zbekistondan Rossiyaga qaytib kirib kelishdan oldin Rossiya IIVning internetdagi veb-sahifasi orqali ularga nisbatan ushbu mamlakatga kirish uchun qo‘yilgan cheklov muddatini aniqlash lozimligi tushuntirildi.
Bundan tashqari, fuqarolarimizga Sud ijrosi federal xizmatining veb-sahifasi orqali Rossiyada fuqarolarning qarzdorligi mavjud yoki mavjud emasligini tekshirish imkoni mavjudligi bo‘yicha ham ma’lumot berildi.
Izoh (0)