Foto: Toshkentda Xalqaro axborotdan erkin foydalanish kuniga bag‘ishlangan xalqaro konferensiya bo‘lib o‘tmoqda
Toshkent shahrida Prezidenti administrasiyasi huzuridagi Axborot va ommaviy kommunikatsiyalar agentligi, Milliy mass-mediani qo‘llab-quvvatlash va rivojlantirish jamoat fondi hamda YUNESKO hamkorligida “Sun’iy intellekt, elektron boshqaruv va axborot erkinligi: innovatsiyalar, inklyuzivlik va huquq” mavzusida xalqaro konferensiya o‘tkazilmoqda.
Ikki kun davom etishi rejalashtirilgan ushbu tadbir bir nechta sho‘bani o‘z ichiga olgan bo‘lib, ularda axborot olish erkinligi sohasidagi eng dolzarb mavzular, jumladan:
Axborotdan erkin foydalanishga inklyuziv yondashuvni ilgari surishda elektron boshqaruv va sun’iy idrokning roli;
Maqsadlar shaffofligi: raqamli texnologiyalar davrida ishtirok etish va hisobdorlikni qanday ta’minlash mumkin?
Axborot olish to‘g‘risidagi qonun va uni amalga oshirish sohasidagi muvaffaqiyatlar kabi mavzularda muhokama hamda suhbatlar bo‘lib o‘tishi kutilmoqda.
Shuningdek, anjuman doirasida “Ijtimoiy mulk hisoblangan davlat ma’lumotlarini rivojlantirish va targ‘ib qilish siyosatining yangilangan yo‘riqnomasi tamoyillari”, “Shaffoflik, innovatsiya va elektron boshqaruvni qo‘llab-quvvatlash bo‘yicha yo‘riqnoma tamoyillari” hamda “Axborotdan erkin foydalanish bo‘yicha pullik onlayn-trening” taqdimotlarini o‘tkazish bilan bir qatorda, Toshkent deklaratsiyasini qabul qilish ham ko‘zda tutilgan.
Ma’lumot uchun, YUNESKOning 2015-yilgi konferensiyasida qabul qilingan rezolyutsiyaga asosan, 28-sentabr Xalqaro axborotdan erkin foydalanish kuni deb e’lon qilingan. BMT Bosh assambleyasi tomonidan barcha mamlakatlarda axborot olish huquqining ta’minlanganlik darajasini nazorat qilish YUNESKO zimmasiga yuklangan. Har yili ushbu sana arafasida axborot olish imkoniyatlarini kengaytirish bo‘yicha turli davlatlarda erishilgan natijalar tahlil qilinadi.
“Daryo” fotomuxbiri konferensiyaning birinchi kunidan fotogalereya tayyorladi.
Izoh (0)