Ташқи меҳнат миграция агентлигининг Екатеринбург шаҳридаги вакиллиги ва мамлакатнинг Бош консулхона ходимлари ҳудуддаги Хорижий фуқароларни вақтинчалик сақлаш марказига ташриф буюрди. Ташриф доирасида ушбу муассасада вақтинчалик жойлаштирилган 46 нафар фуқаро билан давра суҳбати ташкил этилди.
Суҳбатда уларга ушбу давлат қонунларига риоя қилиш, низоли вазиятларга аралашмаслик, муаммоли вазиятларда ваколатли органлар ҳамда мамлакатнинг ушбу давлатдаги дипломатик идораларига мурожаат қилиш кераклиги тушунтирилди.
Шунингдек, меҳнат мигрантлари билан асосан уларни ватанга тезроқ қайтиш масалалари ва содир этилган ҳуқуқбузарликларига нисбатан чиқарилган суд қарори тафсилотларига оид масалалар бўйича суҳбатлашилди. Мулоқот чоғида фуқароларнинг аксарияти Россияда бўлиш тартиб-қоидаларини бузгани сабабли ушбу муассасага келтирилганлиги маълум бўлди.
Ватандошларга суд қарори асосида Россиядан чиқариб юбориш чораси қўлланилганида Ўзбекистондан Россияга қайтиб кириб келишдан олдин Россия ИИВнинг интернетдаги веб-саҳифаси орқали уларга нисбатан ушбу мамлакатга кириш учун қўйилган чеклов муддатини аниқлаш лозимлиги тушунтирилди.
Бундан ташқари, фуқароларимизга Суд ижроси федерал хизматининг веб-саҳифаси орқали Россияда фуқароларнинг қарздорлиги мавжуд ёки мавжуд эмаслигини текшириш имкони мавжудлиги бўйича ҳам маълумот берилди.
Изоҳ (0)