Tokioda yuzlab odamlar Yaponiya sobiq bosh vaziri Sindzo Abening davlat dafn marosimi o‘tkazilishiga qarshi norozilik bildirish uchun ko‘chalarga chiqdi. Aksiyaning ko‘plab ishtirokchilari “Davlat dafn marosimiga qarshimiz!”, “Dafn marosimi bekor qilinsin!” deb yozilgan plakatlar ko‘tarib olgan. Hozircha hibsga olinganlar haqida xabar berilmagan.
Sindzo Abening davlat dafn marosimi bugun, 27-sentabr kuni bo‘lib o‘tmoqda. Marhum sobiq bosh vazir xotirasiga hurmat bajo keltirmoqchi bo‘lgan odamlar ham ko‘chalarga chiqmoqda. Kudanzaka istirohat bog‘ida fuqarolarning gul qo‘yishiga mo‘ljallangan ikkita mehrob o‘rnatildi. Bog‘ dafn marosimi bo‘lib o‘tadigan “Budokan” arenasi yaqinida joylashgan. Marosimda 20 mingga yaqin politsiyachi xavfsizlikni ta’minlamoqda.
Sindzo Abe 8-iyul kuni mitingda nutq so‘zlayotgan vaqtda otib o‘ldirilgan edi. Shifokorlar so‘zlariga ko‘ra, siyosatchi bo‘ynining o‘ng qismidan, shuningdek, yuragidan yaralangan.
Izoh (0)