AQSH ma’muriyati Rossiya tomonidan yadro quroli qo‘llanilgan taqdirda amalga oshiriladigan harakatlar rejasini tuzib qo‘ygan. Bu haqda AQSH davlat kotibi Entoni Blinken CBS telekanaliga bergan intervyusida ma’lum qildi.
Ammo u reja tafsilotlariga to‘xtalmadi.
Blinkenning bayonoti Rossiya prezidenti Vladimir Putinning mamlakat hududiy yaxlitligiga nisbatan xavf paydo bo‘lgan taqdirda, Moskva yadro qurolidan foydalanishi mumkinligi haqidagi gaplari fonida yangradi. O‘zining 21-sentabr kungi murojaatida qisman safarbarlik haqida e’lon qilayotib, Putin G‘arb Rossiyaga qarshi “yadroviy tovlamachilik” qo‘llayotganini aytgandi.
“Mamlakatimiz hududiy yaxlitligiga tahdid paydo bo‘lgan taqdirda, Rossiya va xalqimizni himoya qilish uchun, shubhasiz, qo‘l ostimizdagi barcha vositalardan foydalanamiz. Bu quruq tahdid emas… Bizga yadro quroli bilan tovlamachilik qiladiganlar bilib qo‘yishi kerak, shamol yo‘nalishi ular tomonga qarab o‘zgarishi mumkin”, — degan edi u.
Avvalroq AQSH prezidentining Milliy xavfsizlik bo‘yicha maslahatchisi Jeyk Sallivan Oq uy Rossiyani ushbu turdagi quroldan foydalanish halokatli oqibatlari haqida ogohlantirganini aytgandi.
“Biz Kremlga to‘g‘ridan to‘g‘ri, xususiy ravishda, juda yuqori darajada, yadro qurolidan har qanday foydalanish Rossiya uchun halokatli bo‘lishini, Qo‘shma Shtatlar va ittifoqchilarimiz keskin javob berishini aytdik. Biz bu nimaga olib kelishini aniq va ravshan ta’kidlaganmiz”, — dedi Sallivan.
Izoh (0)