Американинг жамоатчилик фикрини ўрганиш бўйича Gallup институти дунёнинг 122 та мамлакати фуқаролари орасида сўров ўтказиб, Глобал ҳиссиётлар ҳисоботини (Gallup Global Emotions Report) эълон қилди. Унга кўра, энг салбий ҳиссиётлар бўйича Афғонистон етакчилик қилмоқда.
Тадқиқотчилар қарийб 127 минг респондентдан бир кун аввалги ижобий ва салбий таассуротлари ҳақида интервью олган. Чунончи, ижобий таассуротлар ҳақидаги саволлар «Яхши дам олдингизми?», «Сизга ҳурмат билан муносабатда бўлишдими?», «Кўп табассум қилдингизми ёки кулдингизми?», «Бирон қизиқарли нарсани билиб олдингизми ёки қизиқарли машғулот билан шуғулландингизми?», «Қувонч туйғусини ҳис қилдингизми?» кабилардан иборат бўлса, салбий таассуротлар ҳақидагилари эса оғриқ, хавотир, ғам-қайғу, стресс ва жаҳл туйғулари ҳақида бўлди.
Таъкидлаш жоиз, айнан стресс туйғуси кўрсаткичи бўйича Ўзбекистон охирги ўринда жойлашди. «Стресс ҳис қилдингизми?» — деган саволга респондентларнинг 12 фоизигина »Ҳа» деб жавоб берган.
Ижобий таассуротлар кўрсаткичи (Positive Experience Index)
Умумий ижобий таассуротлар кўрсаткичи бир неча йиллик барқарорлик (100 дан 71 балл)дан кейин 69 га тушиб қолди. Кўпчилик одамлар уларга ҳурмат билан муносабатда бўлишганини ҳис қилган (86 фоиз), бироқ 50 фоизигина қандайдир янги нарса ўргангани ёки қилганини айтган. Одамлар унчалик яхши дам олмаган ва камроқ хурсандчилик ҳис қилган, бироқ кўпроқ кулган ёки табассум қилган.
Ижобий ҳиссиётлар даражаси энг юқори бўлган мамлакатлар ўнлигини Панама (100 дан 85), Индонезия (84), Парагвай (84), Сальвадор (82), Гондурас (82), Никарагуа (82), Исландия (81), Филиппин (81), Сенегал (81) ва Дания (80) ташкил қилди.
Рейтингнинг энг пастки ўринларини эса Афғонистон (32), Ливан (37), Туркия (42), Миср (52), Непал (53), Тунис (57), Иордания (58), Бангладеш (58), Жазоир (58) ва Украина (60) банд этди.
Умумий кўрсаткичлар бўйича Ўзбекистон ўнталикка кирмаган бўлса-да, баъзи алоҳида кўсаткичлар бўйича юқори ўринларни эгаллади. Чунончи, яхши дам олганлик ҳиссиёти даражасига кўра, Ўзбекистон 4-ўринда жойлашди: респондентларнинг 84 фоизи «Яхши дам олдингизми?» деган саволга, тасдиқ жавобини берган. Бундан ташқари, ҳурматни ҳис қилиш даражаси бўйича Ўзбекистон 8-ўринда жойлашди: бунга оид саволга респондентларнинг 96 фоизи ижобий жавоб берган.
Салбий таассуротлар кўрсаткичи (Negative Emotions Index)
Хавотир (42%), стресс (41%), жисмоний оғриқ (31%), қайғу (28%) даражасига кўра, 2021 йил ушбу индекс тарихидаги энг қийин йилга айланган.
Салбий ҳиссиётлар даражаси энг юқори бўлган мамлакатлар ўнлигини Афғонистон (59), Ливан (58), Ироқ (51), Сьерра-Леоне (50), Иордания (48), Туркия (46), Бангладеш (45), Эквадор (45), Гвинея (45) ва Бенин (44) ташкил қилди.
Салбий таассуротлар кўрсаткичи энг кам бўлган мамлакатлар қаторига эса Қозоғистон (14), Тайвань (16), Косово (17), Мавритания (18), Сингапур (19), Мўғулистон (19), Малайзия (19), Литва (19), Жанубий Африка (20) ва Латвия (20) кирди.
Ўзбекистоннинг салбий ҳиссиётлар бўйича кўрсаткичига келсак, умумий рейтингда ўнталикка кирмаган бўлса-да, айнан стресс даражаси бўйича Қозоғистон билан бирга 1-ўринда (12), хавотир кўрсаткичи бўйича 5-ўринда жойлашди.
Ҳиссиётлар даражалари ранг билан ифодаланган харитага кўра, Ўзбекистон ва умуман, Марказий Осиё мамлакатлари ижобий ҳиссиётлар кўрсаткичи юқори ва аксинча, салбий ҳиссиётлар даражаси паст бўлган давлатлар бўлиб чиқди.
Изоҳ (0)