Ukraina prezidenti Vladimir Zelenskiy o‘zining kechki murojaatida Rossiya tomonidan egallab olingan hududlar aholisini “har qanday yo‘l bilan Rossiya safarbarligidan yashirinishga” chaqirdi.
“Chaqiriq qog‘ozlariga chap bering. Ukrainaning erkin hududiga chiqib ketishga harakat qiling”, — dedi Zelenskiy.
Baribir Rossiya armiyasiga borib tushganlarni esa Ukraina prezidenti dushmanning har qanday faoliyatiga to‘sqinlik qilishga, Rossiya operatsiyalariga xalal berishga, Ukraina tomoniga barcha muhim ma’lumotlarni, shu jumladan, bazalar, shtablar va o‘q-dori omborlari haqidagi axborotni uzatishga chaqirdi.
“Va imkoniyat tug‘ilishi bilanoq bizning pozitsiyalarimizga o‘tib keting. Hayotingizni saqlab qolish va Ukrainani ozod etishga yordam berish uchun bor imkoniyatingizni ishga soling”, — deya ta’kidladi Zelenskiy.
Rossiya prezidenti Vladimir Putin 21-sentabr kuni “qisman safarbarlik” haqida e’lon qildi. Armiyaga chaqiriladigan odamlar soni ko‘rsatilgan band safarbarlik haqidagi farmonda maxfiylashtirib qo‘yilgan. “Novaya gazeta. Yevropa” nashri xabariga ko‘ra, ushbu bandda bir million kishi armiyaga chaqirilishi haqida aytiladi. Meduza’ning federal vazirliklardan biriga yaqin manbasi aytib berishicha, armiyaga 1,2 million kishini chaqirish rejalashtirilmoqda.
Izoh (0)