Украина президенти Владимир Зеленский ўзининг кечки мурожаатида Россия томонидан эгаллаб олинган ҳудудлар аҳолисини «ҳар қандай йўл билан Россия сафарбарлигидан яширинишга» чақирди.
«Чақириқ қоғозларига чап беринг. Украинанинг эркин ҳудудига чиқиб кетишга ҳаракат қилинг», — деди Зеленский.
Барибир Россия армиясига бориб тушганларни эса Украина президенти душманнинг ҳар қандай фаолиятига тўсқинлик қилишга, Россия операцияларига халал беришга, Украина томонига барча муҳим маълумотларни, шу жумладан, базалар, штаблар ва ўқ-дори омборлари ҳақидаги ахборотни узатишга чақирди.
«Ва имконият туғилиши биланоқ бизнинг позицияларимизга ўтиб кетинг. Ҳаётингизни сақлаб қолиш ва Украинани озод этишга ёрдам бериш учун бор имкониятингизни ишга солинг», — дея таъкидлади Зеленский.
Россия президенти Владимир Путин 21 сентябрь куни «қисман сафарбарлик» ҳақида эълон қилди. Армияга чақириладиган одамлар сони кўрсатилган банд сафарбарлик ҳақидаги фармонда махфийлаштириб қўйилган. «Новая газета. Европа» нашри хабарига кўра, ушбу бандда бир миллион киши армияга чақирилиши ҳақида айтилади. Meduza’нинг федерал вазирликлардан бирига яқин манбаси айтиб беришича, армияга 1,2 миллион кишини чақириш режалаштирилмоқда.
Изоҳ (0)