Toshkent viloyatida 2023-yildan “Mening birinchi uyim” yangi ipoteka dasturi yo‘lga qo‘yiladi

22-sentabr kuni Shavkat Mirziyoyev Nurafshon shahrida Xalq deputatlari Toshkent viloyati kengashining sessiyasida ishtirok etdi. Unda agrar sohadagi muammolar sanab o‘tildi, deb xabar beradi “Daryo” muxbiri.

Yig‘ilishda tashkiliy masala — Toshkent viloyatiga hokim tayinlash mavzusi muhokama qilindi. Prezident hozirda viloyat hokimi vazifasini bajaruvchi hisoblangan Zoir Mirzayev nomzodini ilgari surdi.

Nomzod o‘z taqdimotida aholini uy-joy bilan ta’minlash masalasiga ham to‘xtaldi. Bir kishiga uy-joy bilan ta’minlash darajasi respublika darajasidan pastligicha qolayotgani qayd etildi.

Davlat rahbari mutasaddilarga:

• kelgusi yilga ehtiyojmand aholi uy-joy ipotekasi uchun 100 milliard so‘m subsidiya ajratish;
• Zangiota tumanida “Yangi O‘zbekiston” massivini qurish bo‘yicha taklif kiritish;
• Olmaliq, Chirchiq, Angren, Bekobod, Ohangaron, Nurafshon va Yangiyo‘l shaharlarida 19 ta avariya holatidagi ko‘p qavatli uylarda yashovchilarni zamonaviy uy-joy bilan ta’minlash chorasini ko‘rish topshirildi.

Prezident viloyatdagi har bir fuqaroga bir marta yangi qurilgan xonadonni imtiyozli ipotekaga olish imkoniyatini berish kerakligini ta’kidladi. Shu munosabat bilan kelgusi yildan “Mening birinchi uyim” yangi ipoteka dasturini Toshkent viloyatidan boshlash taklif qilindi.