Бухоро вилоятининг бир нечта туманларида ер остидан ноқонуний қазилмалар қазиш олиш билан шуғулланувчи, бироқ солиқдан яшириниб келган корхоналар борлиги аниқланди. Бу ҳақда «Дарё»га вилоят давлат солиқ бошқармаси бошлиғи Мақсуд Маматхонов маълум қилди.
Таъкидланишича, вилоятда ер остидан фойдаланганлик учун солиқ тўловчи субъектлар сони жами 225 тадан иборат.
Вилоят давлат солиқ бошқармаси ходимлари томонидан ер остидан фойдали қазилмалар жумладан, шағал, оҳак, тош қазиб олувчи корхоналарнинг амалдаги қонунчилик талабларига риоя қилиши ҳамда давлат бюджетига солиқларни ўз вақтида тўлиқ тўлаши устидан назорат тадбирлари амалга оширилган.
Тузилган ишчи гуруҳи томонидан 12 та кон ва карерда маркшейдерлик ўлчов ишлари (қазиб олинган ер ости метр кубини ўлчаш) ўтказилган.
«Ўтказилган маркшейдерлик ўлчов ишлари натижасида 9 та ҳолатда ер остидан фойдаланганлик учун солиқ ҳисоботида қазиб олиш ҳажми 282 минг 921 метр/кубга камайтириб кўрсатилгани, шундан 7 та ҳолатда 194 минг 973 метр/куб фойдали қазилма ноқонуний равишда қазиб олингани аниқланди. Бунинг ортидан жами 2,1 миллиард сўм ер остидан фойдаланганлик учун солиқ ҳисобланмасдан қолган», — дейди Мақсуд Маматхонов.
Вилоят давлат солиқ бошқармаси бошлиғининг билдиришича, Ғиждувон туманида фаолият кўрсатаётган «Сардор Отабек Абулфайз» МЧЖ томонидан 50234,5 метр/куб қазилма ҳажми солиқ ҳисоботларида камайтириб кўрсатилган. Ушбу жамият ўзига тегишли бўлмаган карердан 11 296 метр/куб фойдали қазилмани ноқонуний қазиб олган ва унинг оқибатида 0,4 миллиард сўм кам солиқ ҳисобланган. Худди шунингдек, яна мазкур тумандаги «Ботир Бобур омади» МЧЖ томонидан 38 339 метр/куб қазилма ҳажми солиқ ҳисоботларида кўрсатилмагани аниқланган ва 0,3 миллиард сўм солиқ ҳисобланмасдан қолган.
Шофиркон туманида фаолият кўрсатаётган «Озод Жилвон 2018» фермер хўжалиги ҳамда Pomegranate Building масъулияти чекланган жамият томонидан жами 198 113 метр/куб қазилма ҳажми солиқ ҳисоботларидан яшириб келинган.
«Булардан ташқари, ер ости қазилмаларидан фойдаланувчи хўжалик юритувчи субъектлар томонидан расмийлаштирилган электрон ҳисоб-варақ фактуралар орқали реализация қилинган фойдали қазилмалар ҳажмини ер остидан фойдаланганлик учун солиқ ҳисоботида акс эттирилиши таҳлил қилинди. Унда 11 та ҳолатда 630 258 метр/куб (3,9 миллиард сўм) фарқ аниқланди ва шундан ҳозирги кунда 170 596 метр/куб (0,7 миллард сўм) тафовут бартараф этилди. Аниқланган ноқонуний қазиш ҳолатлари ҳуқуқий баҳо бериш учун ҳуқуқни муҳофаза қилувчи органларига юборилди», — деди Мақсуд Маматхонов.
Изоҳ (0)