O‘zbekistonga Rossiyadan yuqori hosil beradigan, turli ob-havo sharoitlariga chidamli bug‘doy navlari urug‘ligi olib kelindi. Bu haqda Qishloq xo‘jaligi vazirligi xabar qildi.
Qayd etilishicha, uzoq yillardan buyon ekib kelinayotgan g‘alla navlarini serhosil va turli stress omillarga chidamli navlar bilan yangilash hamda g‘alla navdorligi, don va un mahsulotlarining sifatini yaxshilash maqsad qilingan. Shu sabab respublika hududlarining iqlim sharoiti va ob-havoning turli xil stress faktorlariga bardoshli Rossiya seleksiyasiga mansub ertapishar, yuqori hosilli bug‘doy navlarining 20 ming tonna urug‘ligi Jizzax viloyatidagi Kenteks MCHJ agroklasteri tomonidan o‘z mablag‘lari hisobiga olib kelingan.
Bugungi kunda ushbu urug‘lik donni belgilangan tartibda tozalash, saralash, dorilash va qadoqlash bo‘yicha tadbirlar olib borilmoqda. Urug‘lik donni respublika bo‘ylab kuzgi muddatlarda ekish uchun g‘alla yetishtiruvchi agroklaster va fermer xo‘jaliklariga to‘g‘ri taqsimlash hamda yetkazib berish ishlari esa Urug‘chilikni rivojlantirish markazi tomonidan tashkillashtirilmoqda. Import qilingan mazkur urug‘lar hisobiga O‘zbekiston sharoitida g‘alla hosildorligi 10-15 foizga oshishi kutilmoqda.
Urug‘chilikni rivojlantirish markazi tomonidan 2023-yil hosili uchun urug‘lik g‘alla maydonlarida o‘tkazilgan dala aprobatsiyasi natijalariga ko‘ra, 77,8 ming gektar yer maydonlari yaroqli deb topilgan hamda 270 ming tonnadan ortiq urug‘lik don jamg‘arilgan.
“Soha olim va mutaxassislarining ko‘p yillik tahlillariga ko‘ra, Rossiya Federatsiyasining Krasnodar o‘lkasidagi P.P.Lukyanenko nomidagi Don milliy markazi seleksiyasiga mansub respublikamiz tuproq-iqlim sharoitiga mos, tabiatning turli stress omillariga chidamli serhosil bug‘doy navlarining yuqori avlodli urug‘liklari hisobiga boshoqli don ekinlaridan yuqori va barqaror hosil yetishtirish imkoniyatlarini bermoqda.
Mazkur markaz seleksioner olimlari bilan 1997-yildan buyon hamkorlik aloqalari o‘rnatilgan bo‘lib, har yili ushbu ilmiy muassasaning 25-30 ta yangi seleksion nav va liniyalari sinovdan o‘tkazilib, mahalliy sharoitlarga introduksiya qilib kelinyapti”, — deyiladi xabarda.
Izoh (0)