Prezident Shavkat Mirziyoyev ichki va tashqi turizm salohiyatini oshirish bo‘yicha o‘tkazgan videoselektor yig‘ilishida Namangan viloyatining Kosonsoy tumani ham tanqid qilinib, hudud hokimiga sohada o‘zgarishlar qilishi uchun uch oy sinov muddati berildi. “Daryo” muxbiri Azizbek Abduvaliyev Kosonsoy tumani hokimi Dilmurod Qodirov bilan uchrashib, tanqiddan keyingi xulosalar va kelgusidagi rejalar haqida suhbatlashdi.
Turizm uchun Kosonsoy tumani kabi jozibali hududni topish qiyin. Tarixiy yodgorliklar bisyor, tabiati betakror, sayyohlarga sifatli xizmat ko‘rsatish uchun infratuzilma yaratilgan. Faqat biz mutasaddilar bu imkoniyatlardan to‘laqonli foydalana olmadik va davlat rahbari tomonidan haqli ravishda e’tiroz bildirildi. Endi bu yo‘nalishda e’tiborsiz bo‘lish va sustkashlik qilishga haqqimiz yo‘q”, — deydi tuman hokimi.
Dilmurod Qodirovning qayd etishicha, ikki ming yildan ortiq tarixga ega ko‘hna Kosonsoyda turistlarni jalb etadigan yigirmadan ortiq arxeologik va me’moriy obidalar bor. Jumladan, Kushoniylar davlati poytaxti bo‘lgan Mug‘tepa arxeologik yodgorligi, o‘ninchi asrga oid “G‘o‘zapoyamozor”, qadimiy yer osti hammomlari, “Shayx Yusufxon Eshon”, “Maxdumi A’zam” ziyoratgohlari, “Jome’” va “Sadpiri komil” masjidlari ziyorat turizmini jadal rivojlantirish uchun muhim omil bo‘la oladi.
Tumanimizda respublikaning barcha viloyatlari va qo‘shni davlatlar, xususan, Qirg‘izistondan keladigan davolanuvchilarning qadami uzilmaydigan sanatoriylarimiz bor. Demak, tibbiy turizmni yo‘lga qo‘yish uchun sharoitlar yetarli. Yoz oylari tumanimizdagi 150 dan ortiq dam olish maskanlariga kuniga minglab odam keladi. Afsuski, bu maskanlarning barchasi ham xavfsizlik va tashqi ko‘rinish borasida talabga javob beravermaydi. Ularni qayta xatlovdan o‘tkazib, tadbirkorlarimiz bilan bamaslahat xorijlik sayyohlarni ham o‘ziga jalb etadigan ko‘rinishda boshqatdan loyihalashni rejalashtiryapmiz.Dilmurod Qodirov, Kosonsoy tumani hokimi
Kosonsoyning turizm salohiyatini yanada oshirish maqsadida tuman hokimligi tomonidan chora-tadbirlar rejasi ishlab chiqildi. Unga muvofiq, 2022-yil yakuniga qadar “Olmazor” mahallasi hududida “So‘lim obi hayot” MCHJ tomonidan qurib foydalanishga topshirilgan umumiy qiymati 15 milliard so‘mlik “Sog‘lomlashtirish maskani” faoliyatini kengaytirish, “Shirin turizm xizmat ko‘rsatish” MCHJ tomonidan umumiy qiymati 1 milliard so‘m bo‘lgan “Turizm xizmatini tashkil etish” loyihasini ishga tushirish, “Beshtegirmon barakasi” oilaviy korxonasi tomonidan “Dam olish maskanini kengaytirish va mehmon uylari tashkil etish” loyihasini amalga oshirish, “Bahoriston” mahallasidagi mototrassada “Savanna” motoklubi kuboki, hunarmandlarning viloyat festivali va dorbozlar o‘rtasida respublika musobaqasini o‘tkazish rejalashtirilgan. Joriy yil oxirigacha “Oilaviy mehmon uylari” soni 70 taga yetkaziladi, turizm obyektlarida Wi-Fi hududlari ko‘paytiriladi.
Davlat rahbari tomonidan videoselektorda aytilgan “har bir hokim mening viloyatim, shahar va tumanimga sayyohlar qayerga va nimani ko‘rishga keladi degan savolni o‘ziga berishi kerak” degan ta’kid juda o‘rinli. Tumanda shu haqli savolga to‘g‘ri javob topishga qaratilgan chora-tadbirlarni amalga oshirishga allaqachon kirishdik. Bu sa’y-harakatlarimiz yil yakuniga qadar samarasini beradi va Kosonsoy mahalliy hamda xorijiy sayyohlar xaritasidagi eng jozibali manzillardan biri bo‘lib qoladi.Dilmurod Qodirov, Kosonsoy tumani hokimi
Izoh (0)