Prezident Shavkat Mirziyoyev raisligida ichki va tashqi turizm salohiyatini oshirish bo‘yicha o‘tkazilgan videoselektor yig‘ilishida Namangan viloyatining To‘raqo‘rg‘on tumani hokimiga sohada o‘zgarishlar qilishi uchun uch oy sinov muddati berildi. “Daryo” muxbiri Azizbek Abduvaliyev To‘raqo‘rg‘on tumani hokimi Ahrorbek Mansurov bilan suhbatlashib, tanqiddan chiqarilgan xulosalar va kelgusidagi rejalar haqida so‘radi.
“To‘raqo‘rg‘on qadim va tabarruk makon, unda ichki va tashqi turizmni rivojlantirish uchun juda katta imkoniyatlar bor. Axsikent ochiq osmon ostidagi muzeyining o‘ziga qancha sayyohlarni jalb qilsa bo‘ladi. Is’hoqxon Ibrat majmuasi, Xo‘jakalon Abdulmoniy ziyoratgohi uncha-muncha tarixiy shaharlardagi qadamjolardan qolishmaydi. Bundan tashqari, Shahand pashmak holvasi, go‘ja oshi, Xo‘jand uzumlari ham juda mashhur”, — deydi Ahrorbek Mansurov.
Tuman hokimining aytishicha, turizm bo‘yicha yangi loyihalar qilingan, biroq ijrosiga to‘laqonli kirishilmagan. Endi berilgan sinov muddati davomida va undan keyin ham astoydil ishlashga to‘g‘ri keladi. Buning uchun tumanda joriy yil yakuni va 2023-yil mobaynida turistlar oqimini ko‘paytirish bo‘yicha reja-dastur tuzib olindi.
Ushbu dasturga ko‘ra, yil yakuniga qadar To‘raqo‘rg‘onning sayyohlar boradigan manzillari ko‘paytiriladi. Mehmon uylari soni 40 taga yetkaziladi. Shu yil yakuniga qadar kamida 2 ta turistik firma faoliyati yo‘lga qo‘yiladi.
“Shahand” sihatgohining dovrug‘i boshqa viloyatlar, hatto qo‘shni respublikalarga ham tarqalgan. Bu yerga dam olish va salomatligini tiklash uchun keluvchilarni ko‘paytirish maqsadida sihatgoh ma’muriyati bilan yangi davolash muolajalarini yo‘lga qo‘yish haqida kelishib olindi.
“Davlat rahbari tashrif buyurgan Gold Fresh Fruits mas’uliyati cheklangan jamiyatiga qarashli intensiv bog‘larda yetishtirilgan giloslar jahon andozalariga mos. Keyingi yillarda ko‘chatchilikda ham noan’anaviy usullarni joriy etishyapti. Tumanda agroturizmni rivojlantirishda ularning tajribasi bizga qo‘l keladi. To‘raqo‘rg‘onliklar mohir chavandoz va uloqchilar sifatida dong taratishgan. ‘Dengiz tulpori‘ majmuasida uloq-ko‘pkari musobaqalarini muntazam uyushtirish, chavandozlar maktabini tashkil etish, ot sporti yordamida davolash — ippoterapiyani joriy etish yaxshi samara beradi deb o‘ylayman. Qirg‘izistonning Jalolobod viloyatidagi To‘xtagul tumani bilan yaqindan aloqa o‘rnatganmiz. O‘zaro bordi-keldilarimizni ko‘paytirish, qo‘shnilarimizga ma’qul keladigan turpaketlarni taklif etish niyatidamiz”, — deydi tuman hokimi.
Ahrorbek Mansurovning ta’kidlashicha, Sirdaryo sohillarida dam olish maskanlari tashkil etishga talab ham, taklif ham ko‘p. 2023-yilda Sirdaryo qirg‘oqlarida kempinglar tashkil etish bo‘yicha 14 milliard so‘mlik 3 ta loyiha amalga oshiriladi. Is’hoqxon Ibrat majmuasida turli yo‘nalishlardagi tematik festivallar uyushtiriladi. Tumanning xizmat ko‘rsatish joylari va xiyobonlarda esa bepul Wi-fi zonalarini 100 taga yetkazish choralari ko‘riladi.
“Yuqorida keltirib o‘tilgan ishlarni amalga oshirish, belgilangan rejalarni bajarishga hozirdanoq kirishdik. Dastlabki qadam sifatida shu oy yakunida ‘Milliy tiklanish‘ partiyasi viloyat kengashi bilan hamkorlikda turizm salohiyatini oshirish va madaniy meros obyektlarini asrab-avaylashga bag‘ishlangan Farg‘ona vodiysi miqyosidagi seminar o‘tkaziladi. Oktabr oyida esa Axsikentda xalqaro ilmiy forumga mezbonlik qilamiz. Unda xorijiy davlatlarning yetakchi professor-olimlari, istiqbolli investorlari, yirik loyihachilar ishtirok etishi rejalashtirilgan. Umuman, shu tarixiy obyektning o‘ziga yiliga 100 ming nafar sayyohni jalb etish imkoni bor. Bu sa’y-harakatlar bilan nafaqat To‘raqo‘rg‘onning tanilishi, balki tuman iqtisodiyoti rivojiga ham salmoqli hissa qo‘shilgan bo‘ladi. Prezident tomonidan qo‘yilgan talablarda ham shu maqsad mujassam”, — deydi tuman hokimi.
Izoh (0)