Президент Шавкат Мирзиёев раислигида ички ва ташқи туризм салоҳиятини ошириш бўйича ўтказилган видеоселектор йиғилишида Наманган вилоятининг Тўрақўрғон тумани ҳокимига соҳада ўзгаришлар қилиши учун уч ой синов муддати берилди. «Дарё» мухбири Азизбек Абдувалиев Тўрақўрғон тумани ҳокими Аҳрорбек Мансуров билан суҳбатлашиб, танқиддан чиқарилган хулосалар ва келгусидаги режалар ҳақида сўради.
«Тўрақўрғон қадим ва табаррук макон, унда ички ва ташқи туризмни ривожлантириш учун жуда катта имкониятлар бор. Ахсикент очиқ осмон остидаги музейининг ўзига қанча сайёҳларни жалб қилса бўлади. Исҳоқхон Ибрат мажмуаси, Хўжакалон Абдулмоний зиёратгоҳи унча-мунча тарихий шаҳарлардаги қадамжолардан қолишмайди. Бундан ташқари, Шаҳанд пашмак ҳолваси, гўжа оши, Хўжанд узумлари ҳам жуда машҳур», — дейди Аҳрорбек Мансуров.
Туман ҳокимининг айтишича, туризм бўйича янги лойиҳалар қилинган, бироқ ижросига тўлақонли киришилмаган. Энди берилган синов муддати давомида ва ундан кейин ҳам астойдил ишлашга тўғри келади. Бунинг учун туманда жорий йил якуни ва 2023 йил мобайнида туристлар оқимини кўпайтириш бўйича режа-дастур тузиб олинди.
Ушбу дастурга кўра, йил якунига қадар Тўрақўрғоннинг сайёҳлар борадиган манзиллари кўпайтирилади. Меҳмон уйлари сони 40 тага етказилади. Шу йил якунига қадар камида 2 та туристик фирма фаолияти йўлга қўйилади.
«Шаҳанд» сиҳатгоҳининг довруғи бошқа вилоятлар, ҳатто қўшни республикаларга ҳам тарқалган. Бу ерга дам олиш ва саломатлигини тиклаш учун келувчиларни кўпайтириш мақсадида сиҳатгоҳ маъмурияти билан янги даволаш муолажаларини йўлга қўйиш ҳақида келишиб олинди.
«Давлат раҳбари ташриф буюрган Голд Fresh Фруиц масъулияти чекланган жамиятига қарашли интенсив боғларда етиштирилган гилослар жаҳон андозаларига мос. Кейинги йилларда кўчатчиликда ҳам ноанъанавий усулларни жорий этишяпти. Туманда агротуризмни ривожлантиришда уларнинг тажрибаси бизга қўл келади. Тўрақўрғонликлар моҳир чавандоз ва улоқчилар сифатида донг таратишган. ‘Денгиз тулпори‘ мажмуасида улоқ-кўпкари мусобақаларини мунтазам уюштириш, чавандозлар мактабини ташкил этиш, от спорти ёрдамида даволаш — иппотерапияни жорий этиш яхши самара беради деб ўйлайман. Қирғизистоннинг Жалолобод вилоятидаги Тўхтагул тумани билан яқиндан алоқа ўрнатганмиз. Ўзаро борди-келдиларимизни кўпайтириш, қўшниларимизга маъқул келадиган турпакетларни таклиф этиш ниятидамиз», — дейди туман ҳокими.
Аҳрорбек Мансуровнинг таъкидлашича, Сирдарё соҳилларида дам олиш масканлари ташкил этишга талаб ҳам, таклиф ҳам кўп. 2023 йилда Сирдарё қирғоқларида кемпинглар ташкил этиш бўйича 14 миллиард сўмлик 3 та лойиҳа амалга оширилади. Исҳоқхон Ибрат мажмуасида турли йўналишлардаги тематик фестиваллар уюштирилади. Туманнинг хизмат кўрсатиш жойлари ва хиёбонларда эса бепул Wи-фи зоналарини 100 тага етказиш чоралари кўрилади.
«Юқорида келтириб ўтилган ишларни амалга ошириш, белгиланган режаларни бажаришга ҳозирданоқ киришдик. Дастлабки қадам сифатида шу ой якунида ‘Миллий тикланиш‘ партияси вилоят кенгаши билан ҳамкорликда туризм салоҳиятини ошириш ва маданий мерос объектларини асраб-авайлашга бағишланган Фарғона водийси миқёсидаги семинар ўтказилади. Октябрь ойида эса Ахсикентда халқаро илмий форумга мезбонлик қиламиз. Унда хорижий давлатларнинг етакчи профессор-олимлари, истиқболли инвесторлари, йирик лойиҳачилар иштирок этиши режалаштирилган. Умуман, шу тарихий объектнинг ўзига йилига 100 минг нафар сайёҳни жалб этиш имкони бор. Бу саъй-ҳаракатлар билан нафақат Тўрақўрғоннинг танилиши, балки туман иқтисодиёти ривожига ҳам салмоқли ҳисса қўшилган бўлади. Президент томонидан қўйилган талабларда ҳам шу мақсад мужассам», — дейди туман ҳокими.
Изоҳ (0)