Тошкент шаҳрида Бутунжаҳон тозалик куни муносабати билан тозалаш тадбирини ўтказиш мақсадида чиқиндилар йиғилиб қолган, ёмон аҳволдаги нуқта топилмаган. Бу ҳақда Экология ва атроф-муҳитни муҳофаза қилиш давлат қўмитаси раиси ўринбосари Исломбек Боқижонов «Дарё» мухбирига берган қисқача интервьюсида айтиб ўтди:
Исломбек Боқижоновнинг маълум қилишича, сентябрь ойининг учинчи шанбаси Бутунжаҳон тозалик куни деб эълон қилинган бўлиб, Ўзбекистонда ушбу кун 2019 йилдан буён ўтказиб келинади.
«Аввалги йилларга нисбатан бу йил қатнашчилар кўпайди. Волонтёрлар, қизиқувчилар, давлат ишчилари ва қўмитанинг тўлиқ таркиби республиканинг 14 та ҳудудида мана шундай тадбирларни ўтказмоқда. Мазкур тадбирни ўтказиш учун Тошкент шаҳридаги чиқинди тўпланган, энг ёмон аҳволдаги нуқталарни қидирдик, бироқ топа олмадик. Бу ҳам бир хурсандчилик. Ўтган йили қаровсиз паркларимиз бор эди. Бу йил бундай жойлар қолмади», — деди қўмита вакили.
Таъкидланишича, Тошкент шаҳрида, умуман вилоят марказларида тозалик, ободонлаштириш, дарахтлар, кўкаламзорлаштириш масалалари назорат остига олинган.
«Муаммоларни доимий бартараф қилиш чоралари кўриб борилмоқда. Биз бу йил Тошкент вилоятидаги канал бўйида тахминан 5 гектардан каттароқ масофада тозалик ишларини олиб боряпмиз. Натижада 10-15 машина чиқинди чиқиш ҳолатлари кузатиляпти. Умуман олганда, республикада 35-40 мингдан зиёд ободонлаштириш ходимлари бор. Улар эрталаб соат 4 ёки 5 дан туради ва кун давомида шаҳарни тозалайди. Чиқиндиларни йиғади. Ариқ бўйларини супуради. Уларнинг фаолияти бошқа фуқаролар томонидан чиқиндини белгиланмаган жойга ташлангани, табиатга тартибсиз муомалада бўлганидан келиб чиқади. Улар доимий равишда саҳарда туриб, бизнинг тозалигимиз учун, кўзимизга ёмон ҳолатни кўрсатмаслик учун ишлайди. Кейинги йилларда ободонлаштириш ходимлари учун Бутунжаҳон тозалик кунини дам оладиган ҳолатга ўтказиб, уларнинг ўрнига ўзимиз ишлашни мақсад қиляпмиз», — деди Исломбек Боқижонов.
Унинг қўшимча қилишича, қурилиш йўналишида фаолият олиб борадиган тадбиркорлар билан ҳамкорликда ойнинг бир кунини тозалик куни деб эълон қилиш режалаштирилган.
Изоҳ (0)