Germaniya hukumati mamlakat energetika bozoridagi inqirozning oldini olish maqsadida Uniper energetika konserni va yana ikkita yirik gaz importyorini milliylashtirish imkoniyatini ko‘rib chiqmoqda. Bu haqda manbalarga tayanib, Bloomberg agentligi xabar bermoqda.
Ma'lumotlarga ko‘ra, gap shu yil oxirigacha Gazprom Germania deb nomlangan Uniper, Verbundnetz Gas (VNG) va SEFE (Securing Energy for Europe) kompaniyalarini davlat nazoratiga o‘tkazilishi haqida ketmoqda.
Shuningdek, Germaniya hukumati Finlyandiyaning Fortum kompaniyasi (Uniper aksiyalarining 78 foiziga egalik qiladi) nazorat paketini nominal narxda sotib olish imkoniyatini ko‘rib chiqmoqda.
Keyin esa kapitalni oshirish orqali kompaniyaga milliardlab yevro sarmoya kiritadi. Rejaning aniq tafsilotlari hozircha kelishib olinmagan, biroq oraliq qaror yaqin kunlarda qabul qilinishi mumkin.
Mavzuga doir: Germaniya Rossiyaga milliardlab yevro to‘lashda davom etmoqda — Reuters
Germaniya Iqtisodiy ishlar va iqlimni muhofaza qilish vazirligi avvalroq Gazpromning sobiq sho‘ba korxonasi – SEFE’ni milliylashtirish bo‘yicha xolding kompaniya tashkil etilishidan xabardor ekanligini tasdiqlagan edi.
O‘tgan hafta VNG kompaniyasi energiya narxining keskin ko‘tarilishi va Rossiyadan gaz yetkazib berishning qisqarishi sababli davlatdan yordam so‘rab murojaat qilgandi.
Shuningdek, Rossiyaning Germaniyaga yo‘naltirilgan magistral quvuri uzilgani sababli, Uniper kuniga 100 million yevro zarar ko‘rmoqda.
Germaniya hukumati Uniperga moliyaviy yordam ko‘rsatish bo‘yicha muzokaralar haqida izoh berishdan bosh tortdi.
Avvalroq Germaniya stagflyatsiya (iqtisodiy faollik pasayib, narxlar oshishi) xavfi ostida ekanligi haqida xabar berilgan edi.
Izoh (0)