UzDongju paint company ustav kapitalidagi 50 foiz ulushni xususiylashtirish bo‘yicha professional konsalting kompaniyasi tanlab olindi. Bu haqda Davlat aktivlarini boshqarish agentligi xabar berdi.
Tanlov jarayonida 2 ta professional tashkilotlar, jumladan konsorsium shaklidagi takliflar qabul qilinib, ularning moliyaviy taklifi, sohadagi tajribasi, malakasi va belgilangan vazifalarni amalga oshirish bo‘yicha yondashuvlari asosida saralandi.
Saralash natijasida Rezolut kompaniyasi tomonidan Dentons yuridik firmasi bilan konsorsium shaklida bergan taklifi eng maqbul deb topilib, xususiylashtirish bo‘yicha konsultant sifatida tayinlandi.
Rezolut kompaniyasining asosiy faoliyati konsalting, kompaniyalarning xalqaro va mahalliy biznes faoliyatini kompleks qo‘llab-quvvatlash, shuningdek, tijorat nizolarini hal qilish hisoblanadi.
Asosiy mijozlari: davlat tashkilotlari, ishlab chiqarish va qurilish korxonalari, nodavlat notijorat tashkilotlari va boshqalar.
Kompaniya haqida ma’lumot
UzDongju paint company — avtomobillar uchun lak-bo‘yoqlar, plomba va kuzovlarga dastlabki ishlov berish uchun kimyoviy moddalar, tunuka idishlar va metall bochkalar, rezina qistirmalari ishlab chiqaruvchi korxona.
Kompaniya, shuningdek, sport poyabzali ishlab chiqarish sexini o‘z ichiga oladi. Uning ustav kapitali — 28,7 mlrd so‘m.
2021-yil yakuniga ko‘ra, kompaniya 49,2 mlrd so‘m sof tushum olgan.
Avvalroq Angren truba zavodini xususiylashtirish jarayoni davom etayotgani haqida xabar berilgandi.
Izoh (0)