“Bizga yanada adolatli dunyo tartibi kerak” — Rajab Toyyib Erdo‘g‘on

Turkiya prezidenti Rajab Toyyib Erdo‘g‘on Samarqanddagi sammit doirasida mintaqaviy hamkorlikni, jumladan, SHHTga a’zo davlatlar bilan hamkorlikni chuqurlashtirish taklifi bilan chiqdi.

“Global hamkorlik va birgalikda yaqindan ishlash zamonamizning muammo va masalalarini bartaraf etishning kalitidir. Bizning muloqot bo‘yicha hamkor maqomimiz tufayli so‘nggi 10 yil ichida SHHT Osiyoga ochilgan derazalarimizdan biriga aylandi.

SHHT Osiyo mintaqasidagi ishonchli platformadir. Uning faoliyati bois biz bag‘rikenglik, o‘zaro yordam va hamkorlik g‘oyalarini targ‘ib etyapmiz. Turkiyaning maqsadi insonparvarlik qadriyatlariga asoslangan diplomatik harakatlar orqali mintaqada ham, undan tashqarida ham tinchlik kamarini shakllantirishdir.

Biz ko‘plab imkoniyatlar, shu bilan birga ko‘plab muammolar mavjud bo‘lgan zamonda yashayapmiz. Ba’zi mamlakatlar o‘z atrofida devor qurib, boshqalardan ixotalanishga harakat qilmoqda.

Koronavirus pandemiyasi hammamiz bir kemada ekanimizni eslatdi. Bizga yanada adolatli dunyo tartibi kerak”, — deydi Turkiya prezidenti.