ATB “Agrobank” “Daryo” nashri va sayt jurnalisti Otabek Qo‘ldoshevni noxolislikda ayblab, sudga bergani haqida xabar berilgandi. Mazkur sud ikki tomon kelishuvi bilan yakunlandi. Bu haqda sud jarayonida ishtirok etgan “Daryo” muxbiri xabar berdi.
“Agrobank” sayt jurnalisti Otabek Qo‘ldoshev muallifligidagi “Qashqadaryolik tadbirkor banklardan yarim milliarddan ortiq mablag‘ini ololmagach, aholiga tarqatilgan chorva mollarini tortib olmoqda” sarlavhali maqolaga e’tiroz bildirib, “maqola bankning ishchanlik faoliyatiga putur yetkazdi, moliya bozoridagi huquq va manfaatlarining buzilishiga olib keldi”, deya jurnalist va tahririyatni sudga bergandi.
Mazkur jarayonga munosabat bildirgan nashr bank mas’ullariga maqolada aynan bankning ishchanlik faoliyatiga putur yetkazgan, moliya bozoridagi huquq va manfaatlarining buzilishiga olib kelgan qismini ko‘rsatishni, shundan so‘ng mazkur maqolaga raddiya berilishini bildirgandi.
ATB “Agrobank” da’vo arizasiga ko‘ra 2022-yilning 30-avgust kuni soat 10:30 da Fuqarolik ishlari bo‘yicha Mirzo Ulug‘bek tumanlararo sudida boshlangan sud 2022-yilning 16-sentabr kuni yana “Agrobank” taklif qilgan kelishuv bitimi bilan yakuniga yetdi.
ATB “Agrobank” mazkur masalada kelishuvga erishishni, sud jarayoniga yakun yasash taklifini bergach, tahririyat taklifni qo‘llab-quvvatladi.
Kelishuv bitimiga ko‘ra, sayt ATB “Agrobank” bilan bog‘liq maqolalarni e’lon qilishdan avval bank mas’ullari fikrini o‘rganish, ularni ayblayotgan tomonning vajlari qay darajada haqli ekanini bilish maqsadida jurnalistik so‘rov yuborish majburiyatini, bank mas’ullari esa “Daryo” so‘roviga tezkor ravishda javob berish majburiyatini oldi.
Izoh (0)