Ijtimoiy tarmoqlarda 8-sinf Adabiyot fani darsligida Asqad Muxtor to‘g‘risida ma’lumotning bir necha marotaba berilgani aks etgan video e’lon qilingandi. Holat yuzasidan Xalq ta’limi vazirligi munosabat bildirdi.
Qayd etilishicha, videosi tarqalgan 8-sinf Adabiyot fani darsligi maketi 2010-yilda G‘afur G‘ulom nomidagi nashriyot-matbaa ijodiy uyi tomonidan yaratilgan. Mazkur darslik so‘nggi marotaba ushbu nashriyot tomonidan 2019-yilda chop etilgan 4-nashr hisoblanadi.
Yuzaga kelgan vaziyatni o‘rganish maqsadida vazirlik tomonidan 14-sentabr kuni Surxondaryo, Xorazm, Navoiy, Andijon, Toshkent, Qashqadaryo viloyatlari maktablarida aynan 8-sinf Adabiyot fani darsligi ko‘zdan kechirildi. O‘rganish jarayonida keng muhokamaga sabab bo‘lgan holat ko‘zdan kechirilgan darsliklarda mavjud emasligi aniqlandi.
Shu o‘rinda ijtimoiy tarmoqlarda tarqalgan videolavha muallifi farzandiga darslik qaysi maktabda berilganini aniqlash imkoniyati bo‘lmadi (videoda hech qanday ma’lumot berilmagan). Video muallifidan mazkur darslik haqiqatdan ham maktab kutubxonasidan berilgan bo‘lsa, uni vazirlikka @bookedu_bot Telegram boti orqali murojaat qilgan holda maktab kutubxonasiga qaytarib, o‘rniga sifatli darslikni olishini so‘raymiz. Shu bilan birga, videoni tarqatgan ijtimoiy tarmoq foydalanuvchilaridan holat yuzasidan ma’lumotni vazirlikka taqdim etishlarini va uni ijobiy hal qilinishida yordam berishlarini so‘rab qolamiz, — deyiladi munosabatda.
Izoh (0)