АҚШнинг республикачи ва демократ сенаторлари Линдси Грем ва Ричард Блюментал Давлат департаменти позициясини четлаб ўтиб, Россияни терроризмга ҳомийлик қилувчи давлатлар рўйхатига киритиш тўғрисидаги қонун лойиҳасини тақдим этди, деб ёзади Politico.
«Маъмурият бу борада бошқача фикрда эканини жуда яхши биламиз. Ҳурмат кўрсатган ҳолда, мен бу фикрга қўшилмайман», — деди Блументал матбуот анжуманида журналистларга.
Давлат департаменти матбуот котиби Нед Прайс 14 сентябрь куни бўлиб ўтган брифингда Россияни бу рўйхатга қўшиш нохуш оқибатларга олиб келиши мумкинлигини айтди. Оқ уй ҳам худди шундай позицияда. Шу билан бирга, Прайс АҚШ маъмурияти Конгресс билан муқобил чораларни муҳокама қилаётганини таъкидлади.
Аввалроқ Россия Ташқи ишлар вазирлиги терроризмга ҳомийлик қилувчи давлатлар рўйхатига киритилиш икки томонлама муносабатларда «орқага қайтмаслик нуқтаси» бўлишидан огоҳлантирган. Вазирлик агар бундай қарор қабул қилинса, дипломатик муносабатлар тўлиқ узилишини истисно этмаган.
Россияни терроризм ҳомийси бўлган давлат деб тан олиш ғояси АҚШда апрелдаёқ пайдо бўлган, ўшанда Давлат департаменти шундай имкониятни кўриб чиқаётганини маълум қилганди. The Washington Post газетаси эса шундай илтимос билан АҚШ президенти Жо Байденга Украина етакчиси Владимир Зеленский мурожаат қилганини ёзганди. Бунга жавобан Байден мазкур масалада аниқ баёнотлар бермаган ва расмий Москвага босим ўтказишнинг турли йўлларини кўриб чиқишга тайёрлигини таъкидлаган.
Июль охирида АҚШ Сенати Давлат департаментини Чеченистон, Грузия, Сурия ва Украинадаги воқеалар муносабати билан Россияни терроризмнинг ҳомийси сифатида тан олишга чақирувчи резолюцияни қабул қилган эди.
Шу кунгача АҚШ терроризм ҳомийси сифатида тўртта давлатни тан олган: Сурия (1979 йил декабрда), Эрон (1984 йил январда), Шимолий Корея (2017 йил ноябрда) ва Куба (2021 йил январда).
Сентябрь ойи бошида Байден Россияни терроризм ҳомийси деб тан олиш керак деб ҳисоблаш-ҳисобламаслиги ҳақидаги саволга «йўқ» деб жавоб берганди. Оқ уй Байден бундай чорани қўлламасликка қарор қилганини тасдиқлади.
Изоҳ (0)