Ўзбекистоннинг Саудия Арабистонининг Жидда шаҳридаги Бош консулхонаси томонидан мамлакатда ишлаб чиқарилган ва етиштирилган маҳсулотлар экспорти ҳажмини ошириш мақсадида Vision Development компанияси бош директори Мужаҳид Хан Абрар Хан билан учрашув ташкил этилди. Бу ҳақда «Дунё» ахборот агентлиги хабар қилди.
Қайд этилишича, суҳбат давомида жиддалик тадбиркорнинг эътиборига Ўзбекистонда иқтисодиётни либераллаштириш ва ташқи савдони ривожлантириш йўлидаги ислоҳотлар, хорижий импортчилар учун яратилган бизнес қулайликлар, республикадаги экспортёрлик муҳитининг жозибадорлиги ҳамда эркин иқтисодий ҳудудлар фаолияти ҳақидаги батафсил маълумотлар ҳавола этилгани баробарида Ўзбекистондаги BMB Trade Group компанияси маҳсулотларининг тақдимоти ҳам ўтказилган.
Vision Development компанияси бош директори Мужаҳид Хан қуруқ мевалар ва заъфаронни Ўзбекистондан Саудия Арабистонига олиб келишга қизиқиш билдирган. У Ўзбекистон компаниялари билан ҳамкорлик ўрнатиш асносида ўзбек маҳсулотларининг подшоҳликка импортини йўлга қўйишга тайёр эканини маълум қилган.
Хусусан, Мужаҳид Хан BMB Trade Group компанияси билан ўзаро ҳамкорликни йўлга қўйиб, мазкур компаниянинг Саудия Арабистонида диллерлик хизматини кўрсатишга ҳам тайёрлигини айтган.
Vision Development компанияси бош директори жорий йил 14 сентябрь куни Жидда шаҳрида бўлиб ўтадиган Ўзбекистон—Саудия бизнесменлари учрашувига ҳам таклиф этилган.
Изоҳ (0)