Kiyev Vashingtondan 300 kilometrgacha masofadagi nishonlarga zarba berishga qodir raketalarni so‘radi

Ukraina hukumati AQSHdan qo‘shimcha qurol-yarog‘, shu jumladan, uzoq masofali raketa tizimlari yetkazib berishni so‘radi. Bu haqda Ukraina hukumati Amerika kongressmenlariga yo‘llagan hujjatda aytiladi, deb yozadi Meduza.

The Wall Street Journal qo‘liga kelib tushgan hujjatda 29 turdagi qurol-yarog‘ tizimlari va o‘q-dorilar keltirilgan bo‘lib, Kiyevning so‘zlariga ko‘ra, “2023-yilda hujumni davom ettirish” uchun u shularga ehtiyoj sezadi.

Ro‘yxatga 300 kilometrgacha masofali yer—yer sinfidagi taktik ballistik raketalar (ATACMS), tanklar, uchuvchisiz uchar qurilmalar, artilleriya tizimlari, “Garpun” kemaga qarshi raketalari, shuningdek, HIMARS baravar o‘t ochish reaktiv tizimlari uchun ikki mingta raketa kirdi.

Qurol-yarog‘ yetkazib berish haqidagi yangi so‘rov Xarkov viloyatida Ukraina kuchlarining muvaffaqiyatli qarshi hujumlari fonida berildi. 1—12-sentabr kunlari Ukraina Qurolli kuchlari o‘z hududining qariyb 6 ming kvadrat kilometr hududini ozod etdi, deya ma’lum qildi Ukraina mudofaa vaziri o‘rinbosari Anna Malyar.

7-sentabr kuni Ukraina Qurolli kuchlari bosh qo‘mondoni general Valeriy Zalujniy va Oliy rada mudofaa qo‘mitasi boshlig‘i o‘rinbosari general-leytenant Mixail Zabrodskiy e’lon qilgan maqolada Ukrainaga urushning borishini o‘zgartirish uchun uzoq masofali qurol-yarog‘, shu jumladan, ATACMS zarurligi aytilgandi.

The Wall Street Journal eslatishicha, avvalroq Vashington katta masofali raketa tizimlarini Kiyevga yetkazib berishdan bosh tortgan, chunki Ukraina ulardan Rossiya hududiga zarbalar berish va keskinlikni oshirishda foydalanishidan xavfsiragan edi.

Nashr hisob-kitoblariga ko‘ra, AQSH prezidenti Jo Bayden ma’muriyati shu paytgacha Ukrainaga 15 milliard dollardan ziyod qiymatda qurol-yarog‘ va xavfsizlik sohasidagi boshqa ko‘maklarni taqdim etgan.