Ozarbayjon Qurolli kuchlari uchta yo‘nalishda Armaniston pozitsiyalarini o‘qqa tutdi, deb yozadi Meduza Armaniston Mudofaa vazirligiga tayanib.
Armaniston harbiy idorasi ma’lumotlariga ko‘ra, 13-sentabr kuni yarim tundan keyin Ozarbayjon harbiylari Goris, Sotk va Jermuk yaqinidagi Armaniston pozitsiyalariga artilleriya va yirik kalibrli qurollardan, shuningdek, uchuvchisiz uchar qurilmalar yordamida o‘qqa tutishni boshlagan.
O‘z navbatida, Ozarbayjon Mudofaa vazirligi xabar qilishicha, Armaniston Qurolli kuchlari bo‘linmalari Ozarbayjon-Armaniston davlat chegarasida Dashkesan, Kelbajar va Lachin yo‘nalishlarida “keng ko‘lamli qo‘poruvchilik”ni amalga oshirgan.
Boku da’vo qilishicha, Armaniston Qurolli kuchlari qo‘poruvchilik guruhlari turli yo‘nalishlarda Ozarbayjon armiyasi pozitsiyalari o‘rtasidagi ta’minot yo‘llarini minalashtirgan. Ozarbayjon bo‘linmalari tomonidan ko‘rilgan “shoshilinch choralar” tufayli jang yuz bergan.
Ozarbayjon harbiy idorasi Armanistonni o‘zining chegaradagi pozitsiyalarini o‘qqa tutishda aybladi va Ozarbayjon Qurolli kuchlari shaxsiy tarkibi orasidagi talafotlar haqida xabar berdi.
Xabarga ko‘ra, Ozarbayjon armiyasi tomonidan “Armaniston Qurolli kuchlari o‘t ochish nuqtalarini bostirish va jangovar to‘qnashuvlar ko‘lami kengayishining oldini olish uchun zarur choralar ko‘rilmoqda”. “Armaniston Qurolli kuchlarining qo‘poruvchilik operatsiyalariga jalb etilgan shaxsiy tarkibi va jangovar texnikasi orasida talafotlar bor”, — deyiladi idora xabarida.
2020-yil sentabrida Tog‘li Qorabog‘da ko‘p yillar davomida birinchi marta to‘liq ko‘lamda jangovar harakatlar boshlangandi. Noyabrda tomonlar Rossiya vositachiligida o‘t ochishni to‘xtatish haqida bitim imzoladi. Janglar yakunlariga ko‘ra, Armaniston Ozarbayjonga tan olinmagan Tog‘li Qorabog‘ respublikasining taxminan yarmi ustidan nazoratni topshirdi. Bundan tashqari, mintaqaga Rossiya tinchlikparvarlari kiritildi.
Izoh (0)