“Ultimatum qo‘yadiganlar bilan gaplashmayman” — Zelenskiy hozir Putin bilan muzokaralar imkonsizligini aytdi

Ukraina prezidenti Vladimir Zelenskiy hozirda Vladimir Putin bilan muzokaraga tayyor emasligini aytdi. U CNN jurnalistining tegishli savoliga shunday javob bergan.

“Bugungi kunlarda yo‘q. Men Rossiya tomonidan konstruktiv bo‘lish borasida hech qanday istak ko‘rmayapman. Ultimatumlarga kelsak: kim ultimatum qo‘yishi muhim emas — xoh u bo‘lsin, xoh boshqa (Putin prezidentlikdan ketgan taqdirda ham). Mening prinsipim shunday: ultimatum qo‘yadiganlar bilan gaplashmayman”, — dedi Ukraina prezidenti.

Zelenskiyning aytishicha, Rossiya bilan kelishuv Rossiya tomonidan bosib olingan Ukraina hududlari ozod qilinganidan keyingina tuzilishi mumkin.

“Nima bo‘lganda ham Rossiya biz bilan chegaradosh, baribir u qo‘shnimiz va juda ko‘p aholiga ega, shuning uchun mamlakatimiz ishg‘oldan chiqarilganidan keyin ham ular bilan qo‘shni bo‘lib yashashga majbur bo‘lamiz”, — dedi Ukraina prezidenti.

Zelenskiyning CNN telekanaliga bergan intervyusi Ukraina harbiylarining Xarkov viloyatidagi muvaffaqiyati fonida chop etildi. Sentabr oyida bir necha kun ichida Ukraina armiyasi rossiyalik harbiylar ko‘p oylar davomida ushlab turgan Xarkovning muhim qismini ozod qilishga muvaffaq bo‘ldi. Rossiya Mudofaa vazirligi chekinishni Xarkovdan “qo‘shinlarni qisqartirish va ko‘chirish operatsiyasi” deb atadi.