2022-yil fevral oyining oxiridan avgustigacha Portugaliya hukumati o‘n nafar rossiyalikdan “oltin viza” – investitsiyalar evaziga yashash uchun ruxsatnoma olish bo‘yicha arizalar qabul qilgan.
Publico gazetasining yozishicha, Portugaliya xorijliklar xizmati va chegara xizmati Rossiyaning Ukrainaga bosqinidan keyin Rossiya fuqarolarining barcha arizalarini rad etgan.
Portugaliya hukumati urush boshlanganidan ikki kun o‘tib, 26-fevral kuni rossiyaliklarga “oltin vizalar” berishni to‘xtatgan.
Golden Visa Portugal dasturi 2012-yildan buyon ishlab kelmoqda. Bu dastur mamlakat iqtisodiyotiga kamida 280 ming yevro sarmoya kiritish orqali Portugaliyada yashash uchun ruxsatnoma olish imkonini beradi. Fevral oyi oxiriga qadar jami 431 nafar Rossiya fuqarosi Portugaliyaning “oltin vizasi”ni olgan, ulardan yetti nafariga vizalar 2022-yil boshida berilgan. Dastur ishga tushirilgandan beri shuningdek, 51 nafar ukrainalik sarmoya evaziga Portugaliyada yashash uchun ruxsatnoma olgan.
Rossiyaning Ukrainaga qarshi urushi boshlanganidan so‘ng, rossiyaliklar uchun oltin viza dasturlari, xususan, Gretsiya, Malta va Ispaniyada ham to‘xtatildi. Britaniya urushdan bir hafta oldin shunday chorani ko‘rgan.
Izoh (0)