“Samarqand sammiti mintaqa va jahon siyosatiga ta’sir qiladi” — Rashid Alimov

SHHTning Samarqand sammiti arafasida Tojikiston prezidenti huzuridagi Davlat xizmati akademiyasi professori, SHHTning sobiq bosh kotibi Rashid Alimov batafsil intervyu berib, erishilgan natijalar, ushbu tashkilotning buguni va kelajagi haqidagi masalalarga to‘xtaldi.

SHHTning Samarqandda bo‘lib o‘tadigan sammit ahamiyati va uning o‘ziga xosligiga baho bersangiz.

— Darhaqiqat, hozir butun dunyoda Yevrosiyo yetakchi davlatlari rahbarlarining uchrashuviga qiziqish ortmoqda. 15—16-sentabr kunlari Samarqand tom ma’noda jahon siyosatining markaziga aylanadi — sammit tashkilotga a’zo mamlakatlar manfaatlariga bevosita ta’sir ko‘rsatadigan, mintaqaviy tinchlik va xavfsizlikni ta’minlashga, umuman olganda, dunyodagi mavjud tartibda sodir bo‘layotgan jarayonlarga ta’sir ko‘rsatadigan mutlaqo yangi sharoitlarda o‘tkaziladi.

Biz global siyosat va iqtisodiyotda tobora kuchayib borayotgan “girdoblar” va jiddiy keskinlikning guvohi bo‘lmoqdamiz. Shuning uchun SHHTga a’zo davlatlar rahbarlari, jumladan, BMT xavfsizlik kengashining doimiy a’zolari (Xitoy va Rossiya) — yadro quroliga ega qudratli davlatlarning ishtiroki xalqaro hamjamiyat uchun katta ahamiyatga ega.

Shunisi muhimki, Samarqand nafaqat sammitning o‘ziga mezbonlik qiladi, balki uning doirasida ko‘plab ikki-uch, hatto to‘rt tomonlama uchrashuvlar bo‘lib o‘tadi, ularning har biri esa mintaqa va jahon siyosatiga ta’sir qiladi. Shu bois Samarqand sammiti chinakam tarixiy hodisa bo‘lishiga ishonchim komil.