ШҲТнинг Самарқанд саммити арафасида Тожикистон президенти ҳузуридаги Давлат хизмати академияси профессори, ШҲТнинг собиқ бош котиби Рашид Алимов батафсил интервью бериб, эришилган натижалар, ушбу ташкилотнинг бугуни ва келажаги ҳақидаги масалаларга тўхталди.
ШҲТнинг Самарқандда бўлиб ўтадиган саммит аҳамияти ва унинг ўзига хослигига баҳо берсангиз.
— Дарҳақиқат, ҳозир бутун дунёда Евросиё етакчи давлатлари раҳбарларининг учрашувига қизиқиш ортмоқда. 15—16 сентябрь кунлари Самарқанд том маънода жаҳон сиёсатининг марказига айланади — саммит ташкилотга аъзо мамлакатлар манфаатларига бевосита таъсир кўрсатадиган, минтақавий тинчлик ва хавфсизликни таъминлашга, умуман олганда, дунёдаги мавжуд тартибда содир бўлаётган жараёнларга таъсир кўрсатадиган мутлақо янги шароитларда ўтказилади.
Биз глобал сиёсат ва иқтисодиётда тобора кучайиб бораётган «гирдоблар» ва жиддий кескинликнинг гувоҳи бўлмоқдамиз. Шунинг учун ШҲТга аъзо давлатлар раҳбарлари, жумладан, БМТ хавфсизлик кенгашининг доимий аъзолари (Хитой ва Россия) — ядро қуролига эга қудратли давлатларнинг иштироки халқаро ҳамжамият учун катта аҳамиятга эга.
Шуниси муҳимки, Самарқанд нафақат саммитнинг ўзига мезбонлик қилади, балки унинг доирасида кўплаб икки-уч, ҳатто тўрт томонлама учрашувлар бўлиб ўтади, уларнинг ҳар бири эса минтақа ва жаҳон сиёсатига таъсир қилади. Шу боис Самарқанд саммити чинакам тарихий ҳодиса бўлишига ишончим комил.
Изоҳ (0)