Tojikistonning Dushanbedan keyingi eng katta shahri bo‘lgan Xo‘jand So‘g‘d viloyatining markazi hisoblanadi. Farg‘ona vodiysining g‘arbiy qismida, Turkiston tog‘ tizmasi bilan Mo‘g‘ultog‘ o‘rtasida, Sirdaryo bo‘yida joylashgan.
Xo‘jandning yoshi taxminan 2,5 ming yildan iborat. Xalq orasida Sirdaryoning chap qirg‘og‘ida Iskandar Zulqarnay barpo etgan qal’a shaharning ajdodiga aylangan, degan qarashlar mavjud.
Xo‘jand shahridagi eng diqqatga sazovor joylaridan biri bu — So‘g‘d viloyati tarixiy muzeyi, Kamol Xo‘jandiy uy-muzeyi va maqbarasini o‘z ichiga olgan “Qal’ayi Xo‘jandi” madaniy-tarixiy majmuasidir.
Kamol Xo‘jandiy nomidagi yashil bog‘da shoirning uy-muzeyi joylashgan bo‘lib, u yerda eski kitoblar, buyuk shoirning ramziy maqbarasi saqlanadi. G‘azal ustasi Xo‘jandiy Xo‘jandda tug‘ilib, o‘z yurtidagi tartibsizlik va notinchlik tufayli Tabrizga ketadi va o‘sha yerda vafot etgan. Yog‘och va granitdan qurilgan maqbarada shoirning Erondagi qabridan keltirilgan bir hovuch tuproq bor.
Shaharning markaziy bozori “Panchshanbe” bo‘lib, uning maydonida ko‘hna Jomiy masjidi joylashgan.
Xayrullo Bozorov boshchiligidagi Farg‘ona viloyati delegatsiyasi Xo‘jand shahrida bo‘lib o‘tgan Tojikiston mustaqilligining 31 yillik tantanalarida ishtirok etdi.
Bayram tantanalarida tojikistonlik taniqli san’atkorlar Nigina Omonqulova, Isroil Fazliddinov bilan birga farg‘onalik xonandalar Abdujalil Qo‘qonov, Valijon Qodirov, Muhsinjon Mo‘minov, Sherali Rahmonov, Diyora Muxtorova ijrosida o‘zbekcha va tojikcha kuy-qo‘shiqlar yangradi.
Izoh (0)