Янги ўқув йилининг бошланиши пойтахт Тошкентнинг талабалар билан гавжумлашиб, ҳаёт суръати жадаллашишига олиб келди.
Талабаликнинг ўзгача завқи, гашти билан биргаликда ташвиши ҳам йўқ эмас. Ана шундай муаммоларнинг дастлабкиси, турар жой масаласи. Бугун кўпчилик талабалар айни шу муаммо билан юзма-юз келган.
«Дарё» мухбири талабаларни қийнаётган мазкур масалани ўрганиш мақсадида Тошкентдаги айрим олий таълим муассасаларида бўлиб, талабалар ўртасида сўровнома ўтказди.
«Дарё» мухбири билан суҳбатлашган талабалардан бири таҳсил олаётган олийгоҳининг ётоқхонасидан жой олиш муаммо бўлаётганини, ижара уйлари эса жудаям қиммат эканини айтмоқда.
«Ётоқхона сўрасак, аввало, биринчи курсларга жой берамиз. Яна ногиронлиги бор, кам таъминланган, чин етимларга, жой ортса, кейин сизга берамиз дейишяпти. Ижарага уй олайлик десак, нархлар жудаям қиммат. Тўрт киши бирлашиб, битта уйни олмоқчи бўлсак, биринчи ойнинг ўзида ҳар биримизга 1 миллион ошиқроқ маблағ тўғри келяпти. Қизларга ҳам навбатга қараб туринглар дейишяпти. Қизлар қаердан квартира топади? Улар ҳам қиз бола боши билан хонадонма-хонадон юриб, «Квартира борми?» деб сўрайдими?», — дейди Тошкент ахборот технологиялари унверситети талабаси.
Талаба набираси учун ижара уй излаётган суҳбатдош онахон эса уй излаб, 10 кундан бери Тошкент кўчаларида сарсон бўлаётгани билдирди.
«Набирамга квартира излаб келдим. Шу йил институтга кирди. Бир ҳафта, ўн кундан бери Тошкент кўчаларида ётибман. Ётоқхонаси яна йигирма кундан кейин тайёр бўлар экан. Узоқдан келган болалар йигирма кун кўчада ётмайди-ку? Нега шуни ўз вақтида тайёрлаб қўйишмайди?
Ижара уйларни тўрт ярим миллион деяпти. Бизга 300 долларлик яхши уй бўлса, набирам беш-олти нафар дўстлари билан турса бўлади. Лекин ўша квартираларда ҳам шароит йўқ-да. Йигирмага яқинини ўзим бориб кўрдим. Борсангиз фақат гилами бор. Уйлар яхши ремонт қилинмаган», - дейди суҳбатдош.
Талабларни қийнаётган мазкур масалага биринчилардан бўлиб эътибор қаратган масъул — ЎзЖОКУ ректори Шерзодхон Қудратхўжа Facebook'даги саҳифасида Тошкент шаҳри аҳолисига мурожаат қилиб, уйларида бўш жойлари бўлса талабаларга ижарага беришларини сўради.
Мазкур муаммо юзасидан 6 сентябрь куни Олий таълим вазири Абдуқодир Тошқулов ҳам ОТМ раҳбарлари иштирокида йиғилиш ўтказди. Унда республика бўйича жами 26009 нафар талаба ётоқхонага жойлаштирилгани, бу жами ётоқхонага эҳтиёжи бор талабаларнинг 31 фоизини ташкил этаётгани маълум қилинди. Шунингдек, 48 минг 309 нафар талаба ижара уйларга жойлашгани, бу эса жами ижарага эҳтиёжи бор талабаларнинг 41 фоизини ташкил этаётгани қўшимча қилинди.
Хўш, мазкур муаммонинг ечими қандай? Муаммо билан юзма-юз келган талабалар ва муаммо ечимига масъул бўлганлар қандай ҳаракат қилади? «Дарё» воқеалар ривожини кузатишда давом этади.
Изоҳ (0)