Yevrokomissiya rahbari Ursula fon der Lyayen Yevropa Ittifoqi (YI) mamlakatlariga Rossiya gaziga narx chegarasi joriy etishni taklif qilishini aytdi. Bu energiya inqiroziga qarshi kurash choralaridan biri bo‘ladi. Bu haqda “Kommersant” xabar bermoqda.
Boshqa takliflar orasida YIda tig‘iz soatlarda elektr energiyasi iste’molini kamaytirish va energiya kompaniyalari daromadlarini cheklash bor.
Fon der Lyayenning so‘zlariga ko‘ra, Ukrainadagi urushdan oldin YI tomonidan import qilinadigan barcha gazning 40 foizi Rossiya hissasiga to‘g‘ri kelgan. Endi bu ko‘rsatkich 9 foizga tushdi.
Biz Ukrainaga qarshi urushni moliyalashtirish uchun foydalaniladigan Rossiya daromadlarini qisqartirishimiz kerak, — dedi Yevrokomissiya rahbari.
Ursula fon der Lyayenning fikricha, Rossiya energetika bozorlarini manipulyatsiya qilmoqda, shuning uchun Yevropa davlatlari gaz uchun haddan tashqari baland narxlarga duch kelmoqda.
Mart oyidan beri YI Rossiya gazining import narxini cheklashni muhokama qilmoqda. Italiya Rossiyadan gazning maksimal narxini 1 MVt/soat uchun 90 yevro miqdorida joriy etishni taklif qildi, ammo Bloomberg ma’lumotlariga ko‘ra, ba’zi davlatlar bunga shubha bilan qaramoqda.
Avvalroq G7 davlatlari Rossiya neftiga yuqori narx chegarasini joriy etishga qaror qilgani haqida xabar berilgandi.
Izoh (0)