Мьянмада Россиянинг ҳам, бошқа ҳар қандай давлатнинг ҳам ҳарбий базаларини яратиш мумкин эмас, чунки бу конституция томонидан тақиқланган. Бу ҳақда Мьянма раҳбари Мин Аун Хлайн «РИА Новости»га берган интервьюсида айтиб ўтди.
«Ҳа, хорижий давлатнинг ҳарбий базасини ташкил этишга рухсат бера олмаймиз. Аммо Россия бизнинг дўстимиз, мудофаа соҳасида ҳамкорликнинг бошқа шаклларини топишимиз мумкин», — деди у Россия Шарқий иқтисодий форуми чоғида.
Мин Аун Хлайн минтақадаги вазиятни барқарорлаштириш учун ҳарбий базалардан ташқари ҳамкорликнинг бошқа шакллари ҳам мавжудлигига ишора қилди.
Шунингдек, август ойи ўрталарида Сербия президенти Александр Вучич мамлакат ўз ҳудудида ҳарбий базаларга муҳтож эмаслигини айтганди.
«Сербиянинг ўзи мамлакат ва халқини ҳимоя қилади, иттифоқ тузади ва Россия, Америка ҳамда Хитой билан яхши муносабатлардан уялмайди. Биз ўзимизга ўзимиз ғамхўрлик қиламиз», — деган у.
Январь ойида Россия Хавфсизлик кенгаши раиси ўринбосари Дмитрий Медведев СССР даврида бўлгани каби Куба ва Венесуэлада Россия ҳарбий базаларини жойлаштириш ҳақида энди гап бўлиши мумкин эмаслигини таъкидлаган.
Унинг сўзларига кўра, бу икки давлат Россиянинг ҳамкорлари бўлиши билан бирга «изоляциядан чиқишга ҳамда маълум даражада АҚШ билан нормал муносабатларни тиклашга интилаётган» суверен давлатлардир.
Изоҳ (0)