Ukraina qurolli kuchlari qarshi hujum doirasida Donetsk viloyatidagi bitta aholi punktini va mamlakat janubidagi yana ikkita aholi punktini ozod qildi. Bu haqda Ukraina prezidenti Vladimir Zelenskiy urushning 193-kun yakunlari bo‘yicha murojaatida aytib o‘tdi.
Bugun men Donetsk viloyatida natijani ta’minlagan — aholi punktini ozod qilgan 103-hududiy mudofaa brigadasining 63-bataloni askarlariga minnatdorlik bildirmoqchiman. Lisichansk—Seversk yo‘nalishidagi 54-brigada ham yaxshi qadamlar tashladi, oldinga siljidi va ma’lum tepaliklarni egalladi. Shuningdek, 42-alohida motopexota batalonini e’tirof etmoqchiman — uning qahramonona harakatlari tufayli davlatimiz janubidagi ikkita aholi punkti ozod qilindi”, — dedi Ukraina rahbari.Zelenskiy qaysi aholi punktlari haqida gap ketayotganiga aniqlik kiritmadi.
4-sentabr kuni Telegram kanallarida Rossiya qo‘shinlarining nazoratida bo‘lgan Xerson viloyatining Visokopolye posyolkasida Ukraina bayrog‘ini ko‘tarayotgan harbiyning surati tarqala boshladi. Keyinroq ushbu fotosuratni Ukraina prezidenti ofisining rahbari Andrey Yermak “Qadam baqadam” degan izoh bilan chop etdi.
Harbiy amaliyotlar to‘g‘risidagi hisobotlarni e’lon qiladigan rossiyaparast “Ribar” Telegram kanalida hech qanday manbaga asoslanmagan holda quyidagi xabar paydo bo‘ldi: “Qurshovga tushmaslik uchun ertalab Rossiya Havo-desant kuchlari bo‘linmalarini Visokopolye janubiy chekkasidagi pozitsiyalaridan olib chiqishga qaror qilindi”.
Izoh (0)