Украина қуролли кучлари қарши ҳужум доирасида Донецк вилоятидаги битта аҳоли пунктини ва мамлакат жанубидаги яна иккита аҳоли пунктини озод қилди. Бу ҳақда Украина президенти Владимир Зеленский урушнинг 193-кун якунлари бўйича мурожаатида айтиб ўтди.
Бугун мен Донецк вилоятида натижани таъминлаган — аҳоли пунктини озод қилган 103-ҳудудий мудофаа бригадасининг 63-баталони аскарларига миннатдорлик билдирмоқчиман. Лисичанск—Северск йўналишидаги 54-бригада ҳам яхши қадамлар ташлади, олдинга силжиди ва маълум тепаликларни эгаллади. Шунингдек, 42-алоҳида мотопехота баталонини эътироф этмоқчиман — унинг қаҳрамонона ҳаракатлари туфайли давлатимиз жанубидаги иккита аҳоли пункти озод қилинди», — деди Украина раҳбари.Зеленский қайси аҳоли пунктлари ҳақида гап кетаётганига аниқлик киритмади.
4 сентябрь куни Telegram каналларида Россия қўшинларининг назоратида бўлган Херсон вилоятининг Високополе посёлкасида Украина байроғини кўтараётган ҳарбийнинг сурати тарқала бошлади. Кейинроқ ушбу фотосуратни Украина президенти офисининг раҳбари Андрей Ермак «Қадам бақадам» деган изоҳ билан чоп этди.
Ҳарбий амалиётлар тўғрисидаги ҳисоботларни эълон қиладиган россияпараст «Рибар» Telegram каналида ҳеч қандай манбага асосланмаган ҳолда қуйидаги хабар пайдо бўлди: «Қуршовга тушмаслик учун эрталаб Россия Ҳаво-десант кучлари бўлинмаларини Високополе жанубий чеккасидаги позицияларидан олиб чиқишга қарор қилинди».
Изоҳ (0)