Qashqadaryo viloyati Qarshi shahridagi “Shodlik” mahallasida joylashgan 2-sonli yotoqxonadan 35 yoshli erkak tushib ketdi. Bu haqda Nasafnews xabar bermoqda.
Ma’lum bo‘lishicha, yotoqxonaning 4-qavatida joylashgan uylardan birida yashovchi 1987-yilda tug‘ilgan erkak M.N. yon qo‘shnilari bilan janjallashib qolgan. Qo‘shnilar unga o‘tkir tig‘li buyumlar bilan jarohat yetkazgani aytilmoqda. Fuqaro esa o‘zini himoya qilish maqsadida uyiga kirib, ustidan qulflab, derazadan daraxtga sakramoqchi bo‘lgan. Ammo daraxtgacha yeta olmay, qulab tushib, voqea joyida halok bo‘lgan. Bu ma’lumotlarni voqeaga guvoh bo‘lgan marhumning boshqa qo‘shnilari aytmoqda.
Hozirda marhum yashagan xonadon huquqni muhofaza qiluvchi organlar tomonidan muhrlangan. Mazkur holat yuzasidan Qarshi shahri prokuraturasi tomonidan tergovga qadar tekshiruv harakatlari olib borilmoqda.
Ma’lumot uchun, mazkur yotoqxona bundan 9 oy avval xaroba ekani bilan tarmoqda qator muhokamalarga sabab bo‘lgandi.
Izoh (0)